მსოფლიო თასის შემდეგ ნაკრებიდან კლუბებს მიბრუნებული საქართველოს ეროვნული ნაკრების მორაგბეები შედეგიან თამაშს განაგრძობენ და ტოპ 14-ში მამუკა გორგოძის ერთი და თამაზ მჭედლიძის დუბლის შემდეგ, გატანილი ლელოთი თავი პრო დ2-ის “ბეზიეს” ლეგიონერმა ლაშა ლომიძემ გამოიჩინა.
მე-9 ტურის თამაშების უმეტესობა საფრანგეთში მომხდარ ტერაქტებამდე გაიმართა, თორემ 13 ნოემბრის შუაღამის შემდეგ აბა ბურთაობისთვის ვიღას ეცალა და “მონ-დე-მარსანისა” და ელიზბარ ყუფარაძის “დაქსის” შეხვედრა ამის გამო გადაიდო.
ლაშა ლომიძის “ბეზიე” მეორე ელიტარული დივიზიონის, პრო დ2-ის მე-9 ტურში “კარკასონს” მასპინძლობდა და მეტოქე 54:15 გაანადგურა. ახალგაზრდა ქართველი მესამეხაზელი სასტარტო შემადგენლობაში იყო და მოედანზე 63 წუთი გაატარა. მისმა გუნდმა პირველი ტაიმი მინიმალური სხვაობით, 13:12 მოიგო, თამაშის განახლებიდან 2 წუთში კი, ლაშამ მიმდინარე სეზონში თავისი პირველი ლელო გაიტანა და ანგარიში 20:12 გახდა. სანამ ლომიძეს შეცვლიდნენ, “ბეზიემ” კიდევ ორი ლელო მიითვალა და მატჩის ბედიც ფაქტობრივად გადაწყვეტილი იყო. ამ მოგებამ და პრემიალური ქულის აღებამ, “ბეზიე” მე-4 ადგილზე გაიყვანა.
პრემიალური ქულით მოიგო ლიდერმა, ზაზა ნავროზაშვილის “ლიონმა”, რომელმაც ამჯერად გიორგი ზაქაშვილის “ექს-ან-პროვანსს” სტუმრად 60:8 აჯობა. მატჩში მონაწილეობა მხოლოდ ზაქაშვილმა მიიღო, რომელიც შეცვლაზე შესვენების შემდეგ შევიდა. ამ დროს მის გუნდს მხოლოდ 2 ლელო ჰქონდა გაშვებული და 3:20 აგებდა, მაგრამ მერე კიდევ 6 ლელო მიიღო.
მხოლოდ პრემიალური ქულა შეხვდა ლევან დათუნაშვილის, მერაბ შარიქაძის, ნიკოლოზ ხატიაშვილისა და გიორგი შარაშიძის “ორიაკს”, რომელიც სტუმრად “ბურგუენთან” 22:25 დამარცხდა. მატჩში მონაწილეობა ორმა ქართველმა მიიღო და ორივე სასტარტო შემადგენლობაში იყო - მეორეხაზელი დათუნაშვილი 66-ე, ხოლო ხატიაშვილი 53-ე წუთზე შეცვალეს. მანამდე, პირველი ტაიმის მიწურულს, ქართველი ბურჯი მეტოქის ბურჯთან ერთად გაასინბინეს. აღსანიშნავია, მატჩის ბედი 78-ე წუთზე მასპინძელთა არეკნმა გადაწყვიტა.
გიორგი ნემსაძის, ირაკლი მირცხულავასა და კახაბერ კობერიძის “ტარბმა”, დიმიტრი ბასილაიასა და გიორგი მჭედლიშვილის “პერპინიანი” 18:16 დაამარცხა. სტუმართა ქართველები განაცხადში არც ამჯერად იყვნენ, ხოლო მასპინძელთა შორის კობერიძემ 63-ე და ნემსაძემ 68-ე წუთიდან შეცვლაზე ითამაშეს. “ტარბი” საათის თავზე 18:9 იგებდა, 67-ე წუთზე ლელო გაუშვა და გარდასახვაც ზუსტი იყო, მაგრამ დარჩენილ დროში თავი კარგად დაიცვა.
ანტონ ფეიქრიშვილის “ბეიონი” რუმინეთის პასპორტის მქონე, ოთარ ტურაშვილის “კოლომიეს” სტუმრად 28:28 დაუზავდა. ორივე ქართველი სასტარტო შემადგენლობაში იყო და ტურაშვილი შესვენებისას, ხოლო ფეიქრიშვილის მე-60 წუთზე შეცვალეს. შეხვედრა გარდამავალი უპირატესობით მიმდინარეობდა, წინ ხან ერთი გუნდი გადიოდა, ხან მეორე, ბოლოს კი, “ბეიონმა” მე-80 წუთზე გატანილი ჯარიმით საყაიმო ანგარიში დააფიქსირა.
ასტამურ იოსელიანისა და ტარიელ რატიანიძის “ნარბონი” “ბიარიცთან” სტუმრად 20:25 დამარცხდა და მხოლოდ პრემიალური ქულა აიღო. რატიანიძე თამაშში 28-ე წუთიდან ჩაერთო და 36-ე წუთზე სინბინით დაისაჯა. ზოგადად, თამაში უხეში გამოდგა. რეფერიმ 33-ე წუთზე ორივე გუნდის თითო მორაგბე წითლით გააძევა, ხოლო სტუმართა გუნდიდან, რატიანიძის გარდა 59-ე წუთზე კიდევ ერთ მორაგბეს უჩვენა ყვითელი ბარათი. შედეგად, ორჯერ 13-კაცის ამარა მოთამაშე გუნდისთვის პრემიალური ქულის აღება დამაკმაყოფილებელ შედეგად უნდა ჩაითვალოს.
ვახტანგ მაისურაძისა და ბექა შეყლაშვილის “ალბი” ქართველი ლეგიონერების გარეშე ეწვია “მონტობანს” და 9:20 დამარცხდა. პრო დ2-ის მომდევნო ტურის თამაშები 26, 27 და 29 ნოემბერს გაიმართება.
2015-2016 წლების პრო დ2-ის სეზონი. IX ტური
12 ნოემბერი
ბურგუენი - ორიაკი 25:22
13 ნოემბერი
ბიარიცი - ნარბონი 25:20
ბეზიე - კარკასონი 54:15
ექს-ან-პროვანსი - ლიონი 8:60
კოლომიე - ბეიონი 28:28
მონტობანი - ალბი 20:9
ტარბი - პერპინიანი 18:16
15 ნოემბერი
მონ-დე-მარსანი - დაქსი (გადაიდო)
გუნდები თ მ ფ წ +/- ქ ბ
| 1. | ლიონი | 9 | 8 | 0 | 1 | 317:138 | 37 | 5 |
| 2. | ორიაკი | 9 | 6 | 0 | 3 | 282:201 | 29 | 5 |
| 3. | ბეიონი | 9 | 6 | 1 | 2 | 244:216 | 28 | 2 |
| 4. | ბეზიე | 9 | 6 | 0 | 3 | 255:186 | 26 | 2 |
| 5. | პერპინიანი | 9 | 5 | 0 | 4 | 199:158 | 23 | 3 |
| 6. | მონტობანი | 9 | 5 | 0 | 4 | 177:198 | 22 | 2 |
| 7. | ალბი | 9 | 5 | 0 | 4 | 171:177 | 22 | 2 |
| 8. | კოლომიე | 9 | 4 | 1 | 4 | 191:198 | 20 | 2 |
| 9. | ნარბონი | 9 | 4 | 0 | 5 | 188:191 | 19 | 3 |
| 10. | ტარბი | 9 | 4 | 0 | 5 | 164:213 | 17 | 1 |
| 11. | მონ-დე-მარსანი | 8 | 3 | 0 | 5 | 174:154 | 16 | 4 |
| 12. | ბურგუენი | 9 | 3 | 0 | 6 | 167:188 | 16 | 4 |
| 13. | კარკასონი | 9 | 3 | 0 | 6 | 150:274 | 13 | 1 |
| 14. | დაქსი | 8 | 3 | 0 | 5 | 165:207 | 13 | 1 |
| 15. | ექს-ან-პროვანსი | 9 | 3 | 0 | 6 | 159:258 | 13 | 1 |
| 16. | ბიარიცი | 9 | 2 | 0 | 7 | 159:205 | 10 | 2 |
X ტური. 26-29 ნოემბერი
დაქსი - ბიარიცი, ალბი - ლიონი, ორიაკი - ექს-ან-პროვანსი, ნარბონი - ტარბი, კარკასონი - მონტობანი, ბეიონი - ბეზიე, ბურგუენი - მონ-დე-მარსანი, პერპინიანი - კოლომიე
