ევროპის 2016 წლის ჩემპიონატის მასპინძელი საფრანგეთი ტერორისტული თავდასხმის ობიექტი გახდა. პარასკევს გვიან ღამით, საფრანგეთისა და გერმანიის საფეხბურთო ეროვნულ ნაკრებთა ამხანაგური მატჩის (2:0) დროს, პარიზის სხვადასხვა უბანში, მათ შორის Stade de France-ს სიახლოვეს, ტერორისტული აქტები განხორციელდა (VIDEO), რომელსაც ფრანგული საინფორმაციო საშუალებების ცნობით, 140-ზე მეტი ადამიანის სიცოცხლე ემსხვერპლა. პირველი აფეთქების ხმა სტადიონის სიახლოვეს მატჩის პირველი ტაიმის დასრულებამდე გაისმა და გულშემატკივრები, რომელთაც წარმოდგენა არ ჰქონდათ რა ხდებოდა, ამას ხმაურით შეხვდნენ. კიდევ ორი აფეთქება განახორციელეს თვითმკვლელმა ტერორისტებმა სტადიონის შემოგარენში შესვენების დროს. ფეხბურთელებმა მომხდარის შესახებ თამაშის დასრულების შემდეგ შეიტყვეს.

სტადიონთან განხორციელებული აფეთქებების პარალელურად, ტეტორისტები ვოლტერის ბულვარში სროლით შეიჭრნენ საკონცერტო დარბაზში, სადაც იმ დროს ამერიკული როკ ჯგუფის Eagles of Death Metal-ის კონცერტი მიმდინარეობდა. სროლის შედეგად დარბაზში 15-მდე ადამიანი დაიღუპა, ასობით მაყურებელი კი მძევლად აიყვანეს, რომელთა გათავისუფლება ფრანგმა სამართალდამცველებმა პარიზის დროით 01:00 საათზე განხორციელებული შტურმის შედეგად მოახერხეს.

საფრანგეთის პრეზიდენტმა ფრანსუა ოლანდმა, რომელიც საფრანგეთი-გერმანიის მატჩს ესწრებოდა და სტადიონიდან სასწრაფოდ გაიყვანეს, ქვეყნის პრემიერმინისტრთან და სამართალდამცავებთან შეხვედრის შემდეგ შუაღამისას ქვეყანაში საგანგებო მდგომარეობის გამოცხადებისა და საზღვრების ჩაკეტვის შესახებ გააკეთა განცხადება.