მხოლოდ გიორგი არაბიძე უელსის 19-წლამდე ნაკრებთან წარმატების მისაღწევად საკმარისი არ გამოდგა. დღეს, “მიხეილ მესხის” სახელობის სტადიონზე გამართული მატჩის ბედი პირველი ტაიმში გაირკვა, როცა ბრიტანელებმა ვასილ მაისურაძის გუნდს დაცვაში უყურადღებო თამაში ერთხელაც არ აპატიეს და შესვენებამდე ოთო გოშაძის კარი სამჯერ აიღეს.
პატარა “ჯვაროსნებს” ელიტრაუნდში გასვლა თუ უნდათ, მომდევნო ორ ტურში ალბანეთთან და ავსტრიასთან მოგება მართებს. დღევანდელ შეხვედრას კი აშკარად ეტყობოდა, რომ ერთი გუნდი მეორეზე მაღლა იდგა. სტუმრებმა დამხვდურები თითქმის ყველა სათამაშო კომპონენტში დაჩაგრეს. განსაკუთრებით, უელსელი ფეხბურთელების სისწრაფეები იყო თვალშისაცემი.
მატჩის პირველმა ნახევარმა საათმა თითქმის თანაბარ ორთაბრძოლაში ჩაიარა, საგოლე მომენტების გარეშე. ტაიმის ბოლო წუთები კი საქართველოს ნაკრებისთვის კოშმარულად ცუდი გამოდგა. ჯერ იყო და “ლომების” მიერ მარჯვენა ფლანგზე გათამაშებული კუთხური შორი მანძილიდან რაის აბრუზესემ ერთი შეხებით დაარტყა, ბურთი გზად გურამ გოშთელიანს მოხვდა და გოშაძეც უძლური აღმოჩნდა. ამის მერე იყო მცირე სათამაშო მონაკვეთი, როცა მასპინძლებს გატანა შეეძლოთ, მაგრამ ამას შედეგი არ გამოუღია და ზედ ტაიმის ბოლო წუთებში ორჯერ გავუშვით. ჯერ ანიელ ჯეიმსმა ითამაშა კონტრშეტევაზე დიდოსტატურად და დაბალი დიაგონალური დარტყმით გაიტანა. ერთ წუთში კი დაცვის ხაზი იმდენად ცუდად გაისარჯა, რომ სიტყვების მოძებნაც ძნელია. შესაბამისად, ჯორჯ ტომასმა თავით ისეთი მანძილიდან დაარტყა, ვერგატანა უფრო ძნელი იყო, ვიდრე ბურთის ბადეში გახვევა – 0:3.
მეორე ტაიმში ტერიტორიულ და სათამაშო უპირატესობას მთლიანად კი ფლობდნენ და რამდენჯერმე გოლის გატანის შანსიც მიეცათ, მაგრამ უშედეგოდ. ყველაზე აქტიური დონეცკის “შახტარის” 17 წლის წევრი გიორგი არაბიძე გახლდათ, თუმცა მას თანაგუნდელები მხარს ვერ უბამდნენ და შეტევებიც ქარს გატანებული რჩებოდა.
მოკლედ სტარტი არცთუ დამაიმედებელი გამოდგა და ელიტ რაუნდში გასვლაზე ფიქრი საკმაოდ რთულია. ყოველშემთხვევაში უელსთან ჩატარებული შეხვედრის შემდეგ ასეთი დასკვნის გამოტანაა შესაძლებელი.
მოდევნო თამაში კი ორ დღეში ალბანეთის ნაკრებთან გვაქვს, რომელმაც ჩვენს დარად I ტურში წააგო, მაგრამ ავსტრიასთან იბრძოლა მაინც... ალბანელთა ძლევა შანსის შესანარჩუნებლად აუცილებელია.
U 19. ევროპის ჩემპიონატის შესარჩევი ტურნირი. VIII ჯგუფი
12 ნოემბერი. თბილისი. მიხეილ მესხის სახელობის სტადიონი
საქართველო - უელსი 0:3 (0:3) VIDEO
საქართველო: გოშაძე, ახალაძე (46. კომახიძე), ნადარაია, კაკიაშვილი, პაპუაშვილი (46. გვარაძე) , მამუჩაშვილი, ალთუნაშვილი, ბიძინაშვილი, არაბიძე, გოშთელიანი (კ), მიქელთაძე (71. კიკნაძე)
მთ. მწვრთნელი: ვასილ მაისურაძე
უელსი: პილინგი, კოქსე, აბრუზესე, გრეჰემი, დეივისი, დ. ტომასი, გ. ტომასი (46. ტიგი), მორელი (კ), ჯეიმსი (85. ჰარისი), ბროადჰედი, ჯ. ტომასი (70. ჰამფრისი)
მთ. მწვრთნელი : დევიდ ჰიუზი
მსაჯი: სრდიან იოვანოვიჩი (სერბეთი)
გოლები: 0:1 აბრუზესე (34); 0:2 ჯეიმსი (45); 0:3 ჯ. ტომასი (45)
გაფრთხილება: ახალაძე (24) - ჯეიმსი (42)
ავსტრია - ალბანეთი 2:1
| 1. | უელსი | 1 | 1 | 0 | 0 | 3:0 | 3 | ||
| 2. | ავსტრია | 1 | 1 | 0 | 0 | 2:1 | 3 | ||
| 3. | ალბანეთი | 1 | 0 | 0 | 1 | 1:2 | 0 | ||
| 4. | საქართველო | 1 | 0 | 0 | 1 | 0:3 | 0 |
14 ნოემბერი
13:00 - ავსტრია - უელსი („მიხეილ მესხი 2“)
14:00 - ალბანეთი - საქართველო („მიხეილ მესხი“)
17 ნოემბერი
14:00 - უელსი - ალბანეთი („მიხეილ მესხი 2“)
14:00 - საქართველო - ავსტრია („მიხეილ მესხი“)
