საქართველოს ეროვნული ნაკრების ნახევარმცველმა ჯანო ანანიძემ კოჭზე ოპერაცია გაიკეთა. როგორც მოსკოვის “სპარტაკის” ოფიციალური ვებგვერდი იუწყება, ქართველს ქირურგიული ჩარევა ფინეთის ქალაქ ტურკუში ჩაუტარდა.
ანანიძე მოსკოვში 12 ნოემბერს დაბრუნდება. კლუბის ექიმების და მათი ფინელი კოლეგების განხილვის შემდეგ დადგინდება თუ რამდენი ხანი დასჭირდება ფეხბურთელის სარეაბილიტაციო პროცესს.
ჯანო საქართველოს ეროვნულ ნაკრებს ესტონეთთან (11) და ალბანეთთან (16) ამხანაგურ მატჩებში ვერ დაეხმარება. ფეხბურთელმა ტრავმის გამო ოქტომბერში ევროშესარჩევი ეტაპის შეხვედრებიც გამოტოვა.
მიმდინარე სეზონში ქართველმა ლეგიონერმა რუსეთის ჩემპიონატში მხოლოდ სამი მატჩი ჩაატარა და ჯამში მოედანზე 84 წუთი დაჰყო.
