როგორც "მსოფლიო სპორტმა" შეიტყო, "ფრაიბურგის" 21 წლის ნახევარმცველი ლუკას ჰუფნაგელი საქართველოს ეროვნულ ნაკრებში გამოიძახეს. კახა ცხადაძე კარგ შანსს აძლევს ფეხბურთელს, რომელსაც აქამდე უთამაშია საქართველოს 17 და 19-წლამდელთა ნაკრებებში.
წინა თვეში ჰუფნაგელი 21-წლამდელებში იყო გამოძახებული, მაგრამ "ფრაიბურგმა" ქართულ მხარეს სთხოვა, ამ ეტაპზე ფეხბურთელი გერმანიაში დაეტოვებინათ და გუნდს კარგად შესჩვეოდა.
ამჯერად პრობლემა აღარაა: ჰუფნაგელი 11 ნოემბერს ესტონეთთან და 16 ნოემბერს ალბანეთთან სათამაშოდ მოდის. მოკლედ, კიდევ ერთ დებიუტანტს ვიხილავთ ცხადაძის გუნდში.
ჰუფნაგელი ამ ზაფხულს გერმანიის მესამე ლიგის "უნტერჰახინგიდან" გადავიდა მეორე ბუნდესლიგის ერთ-ერთ საუკეთესო კლუბში. ის კარგად შეეწყო "ფრაიბურგს", ჩემპიონატში გოლი და სამი საგოლე პასი აქვს.
