საქართველოს ძიუდოისტთა ნაკრებმა აბუ დაბის გრან სლემი ოქროს მედლით გახსნა. სამდღიანი შეჯიბრების პირველ დღეს პოდიუმის უმაღლეს საფეხურზე ირაკლი უზნაძის გუნდის უმსუბუქესი წევრი, ევროპის 2013 წლის ჩემპიონი ამირან პაპინაშვილი (60 კგ) ავიდა.

ფინალის გზაზე ქართველმა ძიუდოისტმა ოთხი მეტოქე ჩამოიშორა. მათ შორის, საქართველოს ნაკრების ყოფილი წევრი – ევროპის 2011 წლის ჩემპიონატის ფინალისტი ბეთქილ შუკვანი, რომელიც ახლა ბექირ ოზლუს სახელითაა ცნობილი და თურქეთის ნაკრების რიგებში გამოდის. ქართველების ქართულ-თურქული დაპირისპირება ნახევარფინალში შედგა და პაპინაშვილმა იპონით მოიგო. იქამდე ამირანმა სამი მეტოქე ჩამოიშორა. საქმეში მეორე წრიდან ჩაერთო და ჩეხ პაველ პეტრიკოვს იუკოთი აჯობა. ახალგაზრდებს შორის ევროპის და მსოფლიოს ჩემპიონს – ესპანელ ფრანცისკო გარიგოსს ვაზარით გასცდა. ევროპის და მსოფლიოს პრიზიორ ჰოვანეს დავთიანს კი სუფთად მოუგო.

გადამწყვეტ ბრძოლაში ამირან პაპინაშვილი 19 წლის მონღოლ ცოგტბაატარ ცენდოჩირს დაეჭიდა და 2 იუკოს სანაცვლოდ ვაზარი-იუკო აუღო. გრან სლემის ოქროს მედალთან ერთად ქართველმა მსუბუქწონოსანმა 500 სარეიტინგო ქულაც გამოიმუშავა და რამდენიმე საფეხურით დაწინაურებაც გაინაღდა. ძიუდოს საერთაშორისო ფედერაციის მიერ დღეს განახლებულ მსოფლიო რეიტინგსიაში პაპინაშვილი მე-11 ადგილზეა.

60 კილოგრამში საქართველოს ნაკრების კიდევ ერთმა წევრმა – ლუხუმ ჩხვიმიანმაც მოირგო კიმონო. კარგადაც დაიწყო – მექსიკელი ნაბორ კასტილიოსა და ძიუდოს საერთაშორისო ფედერაციის სახელით მოჭიდავე ებრაელ არტიომ არშანსკის ძლევის შემდეგ, მერვედფინალში ტურნირზე პირველ ნომრად განთესილ მსოფლიო რეიტინგის ლიდერს – სამხრეთკორეელ ვონ ჯინ კიმსაც აჯობა. მეოთხედფინალში კი უზბეკ დიორბეკ უროზბოევთან დასანანი მარცხი იწვნია და რეპეშაჟის ნახევარფინალში გადაერთო.

ორი შეხვედრის მოგება და ჩხვიმიანი ბრინჯაოს მედალს და 200 ქულას გაინაღდებდა, მაგრამ ყაზახ რუსტამ იბრაიევთან უილეთო ბრძოლაში, ერთით მეტი გაფრთხილების გამო საბოლოოდ მე-7 ადგილს და 80 ქულას დასჯერდა.

აბუ დაბის ტატამზე ჩემპიონ-პრიზიორები მამაკაცთა შორის 66 კილოგრამ წონით კატეგორიაშიც გამოვლინდნენ. საქართველოს ნაკრებისთვის ერთ-ერთ ყველაზე პრობლემატურ წონაში გუნდის უმთავრესმა კანდიდატმა ვაჟა მარგველაშვილმა იჭიდავა, მაგრამ პირველსავე წრეში იპონით წააგო ტაჯიკ უმედ აბდურახმანოვთან. არადა მეტოქეს ვაზარის და ორ იუკოს უგებდა. ამ წონაში ოქროს მსოფლიოს სამხრეთკორეელი ჩემპიონი ბაულ ანი დაეუფლა.

დღესვე, გრან სლემის მედლები ქალებმაც გაითამაშეს, საწყის სამ წონით კატეგორიაში. 48 კილოგრამში ტურნირი წაუგებლად რუსმა ირინა დოლგოვამ ჩაამთავრა, 52-ში ყველას ფრანგმა ანაბელ ორანიმ აჯობა, ხოლო 57-ში – სამხრეთკორეელმა ჯან-დი კიმმა.

ხვალ ვაჟები და ქალები ორ-ორ წონას დანომრავენ (ვაჟები 73 და 81 კილოგრამს, ქალები – 63 და 70 კილოგრამს). საქართველოს ნაკრების წევრთაგან კი ლაშა შავდათუაშვილი (73 კგ), უშანგი მარგიანი (81 კგ) და ესტერ სტამი (70 კგ) იჭიდავებენ.

ძიუდო

გრან სლემი

აბუ დაბი

30 ოქტომბერი

კაცები

60 კგ

1 ამირან პაპინაშვილი (საქართველო)

2 ცოგტბაატარ ცენდოჩირი (მონღოლეთი)

3 რუსტამ იბრაიევი (ყაზახეთი)

3 დიორბეკ უროზბოევი (უზბეკეთი)

7 ლუხუმ ჩხვიმიანი (საქართველო)

66 კგ

1 ბაულ ანი (სამხრეთ კორეა)

2 არსენ გალსტიანი (რუსეთი)

3 გიორგი ზანთარაია (უკრაინა)

3 რიშოდ სობიროვი (უზბეკეთი)

ქალები

48 კგ

1 ირინა დოლგოვა (რუსეთი)

2 ებრუ შაჰინი (თურქეთი)

3 დილარა ლოხმანჰეკიმი (თურქეთი)

3 შიში ქსიე (ჩინეთი)

52 კგ

1 ანაბელ ორანი (საფრანგეთი)

2 ერიკა მირანდა (ბრაზილია)

3 პრისცილა ნეტო (საფრანგეთი)

3 მაილინდა კელმენდი (კოსოვო)

57 კგ

1 ჯან-დი კიმი (სამხრეთ კორეა)

2 ჩენ-ლინგ ლიენი (ტაივანი)

3 ლორედანა ოჰაი (რუმინეთი)

3 ვიოლა ვახტერი (გერმანია)