ესპანური “ლევანტეს” ხელმძღვანელობამ გუნდის მთავარი მწვრთნელის, ლუკას ალკარასის დათხოვნის შესახებ გადაწყვეტილება მიიღო.
პრიმერა დივიზიონის მე-9 ტურში “ლევანტე” “რეალ სოსიედადთან” საკუთარ მოედანზე 0:4 დამარცხდა და 49 წლის სპეციალისტმა გუნდი ამის შემდეგ დატოვა.
ეს წაგება მხოლოდ ბოლო წვეთი იყო, თორემ მწვრთნელს წყალი მანამდეც ჰქონდა შეყენებული. გუნდმა განვლილი 9 თამაშიდან მხოლოდ ერთი მოიგო, 3 ფრე ითამაშა და 6 ქულით სატურნირო ცხრილის ფსკერზე იმყოფება.
ლუკას ალკარასმა “ლევანტეში” მხოლოდ ერთი წელიწადი იმუშავა. ის გუნდის მთავარ მწვრთნელად შარშან ოქტომბერში დანიშნეს. გასული სეზონი “ლევანტემ” მე-14 ადგილზე დაასრულა.
