“ბარსელონას” ნახევარმცველმა ივან რაკიტიჩმა “ბატესთან” მოგებული მატჩის (2:0) შემდეგ ჟურნალისტებთან საუბრისას ნეიმარი შეაქო და განაცხადა, რომ ბრაზილიელი კლუბისთვის უმნიშვნელოვანი ფეხბურთელია.

რაკიტიჩი, რომელიც პირველ ნახევარში ტრავმირებული სერხი რობერტოს ნაცვლად გამოჩნდა მინდორზე, გუშინდელი შეხვედრის გმირი გახდა - მან “ბატესთან” დუბლი გაიფორმა, ორივე გოლი კი, ნეიმარის პასებით გაიტანა.

“მოხარული ვარ, რომ გოლები გავიტანე და გუნდს გამარჯვებაში დავეხმარე, თუმცა მთავარი 3 ქულაა. არ აქვს მნიშვნელობა, თუ ვინ გაიტანს გოლს. ჩვენ კიდევ შეგვეძლო გოლის გატანა.

იმედია რობერტოს ტრავმა მძიმე არაა. მასთან საუბარი ჯერ ვერ მოვასწარი და ვიმედოვნებ, მალე დაგვიბრუნდება.

ნეიმარი ყოველდღიურად პროგრესირებს და უფროდაუფრო უკეთესი ხდება. ის საოცარი ფეხბურთელია და “ბარსელონას” ყოველთვის სჭირდება. ბრაზილიელი კიდევ უფრო მოუმატებს” – ციტირებს ხორვატის სიტყვებს Football Espana.

საუბრის ბოლოს ივანმა დაადასტურა, რომ კიდევ ერთ შვილს ელოდება.

“დიახ, ღვთის ნებით ასეა. მე და ჩემი მეუღლე ოჯახში მატებას ველოდებით”