ქართველმა ჩოგბურთელებმა ეკატერინე გორგოძემ და სოფო ქვაცაბაიამ, რომელთაც ყაზახეთის ქალაქ შიმკენტში მიმდინარე 10-ათასიან ტურნირზე პირველი განთესვა გააჩნდათ, ფავორიტის სტატუსი გაამართლეს და პირველობა არავის დაუთმეს.

გორგოძემ და ქვაცაბაიამ ფინალში სეტისწაუგებლად გააღწიეს, იქ კი, ყველაზე რთული ბრძოლა გადახდათ. მე-3 ნომრად მიჩნეულ უზბეკურ დუეტთან (ხაბიბულინა-მერენკოვა) გამართულმა შეხვედრამ სამ სეტს გასტანა და ქართველმა გოგონებმა 7:5, 3:6, 10:6 იმარჯვეს.

ქვაცაბაიას ერთგვარი დუბლის შესრულების შანსიც აქვს, რადგანაც ერთეულთა შეჯიბრის ფინალშიცაა გასული. მე-2 ნომრად განთესილმა ქართველმა ჩოგბურთელმა მე-4 რეიტინგის მქონე ყაზახი კამილა კერიმბაიევა 7:6 (8:6), 7:5 დაამარცხა და ტიტულისთვის გერმანელ ჯულიეტ სტეურს ეთამაშება.

ცნობისთვის, ამ უკანასკნელმა ასპარეზობა კვალიფიკაციიდან დაიწყო და ნახევარფინალში გორგოძე 6:3, 7:5 დაამარცხა.