ყაზახეთის ქალაქ შიმკენტში მიმდინარე საერთაშორისო ტურნირებზე დანაკარგის გარეშე ასპარეზობენ ქართველი ჩოგბურთელები.

ვაჟთა 10-ათასიან შეჯიბრზე მე-2 ნომრად განთესილმა ალექსანდრე მეტრეველმა ყაზახი არსან არაშოვი 6:0, 6:1 დაამარცხა და მერვედფინალში რუს ტიმურ კიუამოვს ეთამაშება.

მე-2 წრეშია გიორგი ცივაძეც, რომელმაც უზბეკ ოდილ აკრამოვს 6:4, 6:4 მოუგო. მისი შემდეგი მეტოქე მე-3 რეიტინგის მქონე რუსი ივან გახოვია.

წყვილებში მეტრეველმა და ხსენებულმა გახოვმა რუსები კიუამოვი და რაზმაიტოვი 7:5, 3:6, 10:7 დაამარცხეს და მეოთხედფინალში ყაზახ აიაპს და უზბეკ ცოის დაუპირისპირდებიან.

თავის მხრივ ცივაძემ და ბელარუსმა იაციკმა რუსი ფილენკოვი და უზბეკი საიტმუხამედოვი დაჯაბნეს – 7:6 (7:4), 6:0 და ნახევარფინალის საგზურს უზბეკებს – ფაიზიევს და კარიმოვს შეეცილებიან.

ქალთა 10-ათასიანი ტურნირის მერვედფინალში არიან გასულნი სოფო ქვაცაბაია და ეკატერინე გორგოძე.

მე-2 ნომრად განთესილმა ქვაცაბაიამ ყაზახი კამილა ბოლატოვა 6:3, 6:0 დაამარცხა და რუს ალინა ზოლოტარევასთან თამაში ელის.

უზბეკ პოლინა მერენკოვას გაეჯიბრება მე-3 რეიტინგის მქონე გორგოძე, რომელმაც ყაზახ დანელ აშიროვას აჯობა – 6:0, 6:1.

წყვილთა ტურნირში გორგოძემ და ქვაცაბაიამ რუსებს – იაკოვლევას და შარიფოვას 6:3, 6:0 სძლიეს და მეოთხედფინალში ძალებს ინდოელ ეასვარამურტისთან და მოლდოველ სოსნოვიჩთან მოსინჯავენ.