სამხრეთ აფრიკის ნაკრებმა პირველ ტურში განცდილი სენსაციური მარცხის შემდეგ შოკიდან გამოსვლა სწრაფად მოახერხა და სამოას განადგურების შემდეგ, ძლიერ შოტლანდიას დამაჯერებლად და დამსახურებულად ძლია.

“ბოკე” მთელი თამაში დომინირებდა, მათი დაცვა კედელივით იდგა და სქოთებს მისი გარღვევის პრაქტიკული შანსი არც ჰქონიათ. აფრიკელებმა პირველი ლელო მე-12 წუთზე გაიტანეს, როდესაც წითელ ზოლში რამდენიმე დარტყმის შემდეგ ლელოში ძელებთან შევიდნენ და დიდი ჭიდილის შედეგად ბურთი სამმა ერთად დაამიწა, ლელო კი, სხალკ ბერგერის ანგარიშზე ჩაიწერა. ჰანდრე პოლარდმა გარდასახვას ორი ზუსტი ჯარიმაც მიაყოლა, გრეიგ ლეიდლოუმ 30-ე წუთზე შორეული ჯარიმით ჩამორჩენა შეამცირა და მალე შოტლანდიამ რიცხობრივი უპირატესობა მიიღო, როდესაც საქმეში ტელე-რეფერი ჩაერთო და იანი დიუ პლესი გაასინბინა.

ლეიდლოუს შორეულმა დარტყმამ კარამდე ვერ მიაღწია, კაცნაკლულმა აფრიკამ კი, ჯერ კარგი კონტრშეტევით მოიგო მანძილი, მერე დერეფნით შეუტია, მოლით იარა, თამაში რაქში რომ გადავიდა ბურთი სწრაფად გამოვიდა და სიჩქარე აკრეფილი ჯეი პი პიტერსენი ლელოში შეიჭრა. პოლარდის გარდასახვა ზუსტი იყო და ტაიმი 20:3 დასრულდა.

მეორე ტაიმის დასაწყისში შოტლანდიამ ლელოზე სცადა თამაში, მაგრამ არაფერი გამოვიდა და ლეიდლოუმ 3 ქულის აღება ისევ ჯარიმით გადაწყვიტა (20:6). 48-ე წუთზე დანქან ვიარიმ თავის 22-ში ჩაჭრა გადაცემა და მეტოქის 22-მდე ირბინა, მდევარი რომ წამოეწია წაქცეულმა ბურთი თიმ ფისერს ამოუგდო, მანაც, სანამ აუტში გადაიყვადნენ, ის თომი სიმორის გადაუგდო და შოტლანდიამ ლელოს ზუსტი გარდასახვა მიაყოლა. სხვაობა 10 ქულამდე მალევე, პოლარდის მიერ შესრულებული არეკნით გაიზარდა. მალე სინბინით ლეიდლოუ დაისაჯა და ახლა კაცნაკლულმა შოტლანდიამ აიღო ქულები, ჯარიმა ვიარიმ გაიტანა, რაზეც 2 წუთში პოლარდმა ასევე ჯარიმით უპასუხა. პოლარდმა კიდევ ერთი ჯარიმა გაიტანა,მერე სამხრეთ აფრიკამ სათამაშო უპირატესობა ბრაიან ჰაბანას ლელოდ აქცია, რომელმაც 61-ე სანაკრებო ლელო მიითვალა და მართალია “ბოკემ” 34:16 მოგებით პრემიალური ქულა ვერ აიღო, მაგრამ ჯგუფში პირველი ადგილი დაიბრუნა და დიდი ალბათობით მეოთხედფინალშიც დაგეგმილი პოზიციიდან გავა.

2015 წლის მსოფლიო თასი

ბ ჯგუფი

3 ოქტომბერი

სამხრეთ აფრიკა - შოტლანდია 34:16 (20:3)

სამხრეთ აფრიკა: 15. ვილი ლერუ, 14. ჯეი პი პიტერსენი, 13. ჯესი კრილი, 12. დამიან დე ალენდე, 11. ბრაიან ჰაბანა, 10. ჰანდრე პოლარდი, 9. ფური დიუ პრე (კაპ.); 1. ტენდაი “ბისთ” მთავარირა, 2. ბისმარკ დიუ პლესი, 3. იანი დიუ პლესი, 4. იბენ ეცებეთი, 5. ლოდევეიკ ლუდ დე იახერი, 6. ფრანსუა ლოუ, 7. სხალკ ბერგერი, 8. დვეინ ფერმიულენი.

სათადარიგოები: 16. ადრიან სტრაუსი, 17. ტრევორ ნიაკანე, 18. ფრანს მალჰერბე, 19. პიტერ-სტეფ დიუ ტოი, 20. ვილემ ალბერცი; 21. რუან პინარი, 22. პეთ ლემბი, 23. იან სერფონტეინი.

3 ლელო: ბერგერი, პიტერსენი, ჰაბანა

2 გარდასახვა: პოლარდი

4 ჯარიმა: პოლარდი

1 არეკნი: პოლარდი

1 სინბინი: დიუ პლესი

შოტლანდია: 15. სთიუართ ჰოგი, 14. თომი სიმორი, 13. რიჩი ვერნონი, 12. მეთ სქოთი, 11. თიმ ფისერი, 10. დანქან ვიარი, 9. გრეიგ ლეიდლოუ (კაპ.); 1. გორდონ რიდი, 2. ფრეიზერ ბრაუნი, 3. ვილემ ნელი, 4. რიჩი გრეი, 5. ჯონი გრეი, 6. ჯოშ სტრაუსი, 7. ბლერ ქოუანი, 8. დეივ დენთონი.

სათადარიგოები: 16. როს ფორდი, 17. ალესდერ დიქინსონი, 18. ჯონ ველში, 19. თიმ სვინსონი, 20. რაიან ვილსონი; 21. სემ იდალგო-ქლაინი, 22. პითერ ჰორნი, 23. შონ ლამონთი.

1 ლელო: სიმორი

1 გარდასახვა: ლეიდლოუ

3 ჯარიმა: ლეიდლოუ (2), ვიარი

1 სინბინი: ლეიდლოუ