ტოკიოს “რიოგოკუ კოკუგიკანში” მიმდინარე აკი ბაშოს მე-6 დღე ქართველი სუმოისტებისთვის წარუმატებელი გამოდგა: ტოჩინოშინიც დამარცხდა და გაგამარუც.

აღმოსავლეთის კომუსუბის წოდების მქონე ტოჩინოშინმა იგივე ლევან გორგაძემ აღმოსავლეთის ოძეკი ტერუნოფუჯისთან იორიკირით წააგო და 2 მოგების წილ 4 მარცხი მოუგროვდა. ცნობისთვის, ამ უკანასკნელმა ზედიზედ მე-6 გამარჯვება მიითვალა და ერთპიროვნულ ლიდერობას ინარჩუნებს.

ტოჩინოშინის შემდეგი მოწინააღმდეგე ოძეკი კოტოშოგიკუ იქნება, რომელსაც 4 მოგება და 2 მარცხი აქვს. ქართველი სეკიტორი მასთან ურთიერთშეხვედრებში 4:17 მარცხდება.

თანაბარი ბალანსი (3 მოგება, 3 მარცხი) აქვს თეიმურაზ ჯუღელს იგივე გაგამარუს. ქართველმა სუმოისტმა, რომელსაც აღმოსავლეთის მე-9 მაეგაშირას ტიტული გააჩნია, აღმოსავლეთის მე-6 მაეგაშირა ამინიშიკისთან შიტატენაგეთი წააგო.

გაგამარუს მომდევნო დაპირისპირება აღმოსავლეთის მე-7 მაეგაშირა ენდოსთან ელის, რომელსაც ურთიერთშეხვედრებში 2:1 სჯობნის.

სექტემბრის ბაშოს მე-6 დღის მიმოხილვა

გაგამარუს ორთაბრძოლა 6:37-დან, ტოჩინოშინის - 10:18-დან