საქართველოს თავისუფალი სტილით მოჭიდავეთა ნაკრების წევრმა სანდრო ამინაშვილმა (86 კგ) ლას ვეგასში მიმდინარე მსოფლიოს ჩემპიონატზე ბრინჯაოს მედალი და რიო დე ჟანეიროს 2016 წლის ოლიმპიური თამაშების ლიცენზია მოიპოვა. ელიზბარ ოდიკაძეს (97 კგ) კი საპრიზო სამეულამდე ერთადერთი გამარჯვება დააკლდა, მაგრამ სალიცენზიო ნორმატივის შესასრულებლად მეხუთე ადგილიც ეყო.

ამინაშვილმა სეზონის უმთავრესი შეჯიბრება ამერიკელი ჯეიკობ ჰერბერტის ადვილად ძლევით (6:1) გახსნა. მერვედფინალში კი თურქ სელიმ იაშართან 0:2 დამარცხდა და მას შემდეგ, რაც თურქმა ფინალის საგზური გაინაღდა, თავად რეპეშაჟში გადაერთო და ბრინჯაოს გზაზე პუერტორიკოელი ხაიმე იუსეპტ ესპინალი (5:1), ვენესუელელი პედრო ფრანცისკო ჩებალოს ფუენტესი (5:3) და აზერბაიჯანელი მაგომედგაჯი ხატიევი ჩამოიშორა. მეორე წუთზე, მაშინ, როდესაც სანდრო მინიმალური ანგარიშით აგებდა, ხატიევმა მხარის ტრავმის გამო შეხვედრის გაგრძელება ვერ შეძლო და წაგება ჩაეთვალა.

ოდიკაძეს პოდიუმამდე აზერბაიჯანელი ხეთაგ გაზიუმოვის ძლევა დააკლდა (1:4). ქართველმა მოჭიდავემ ოლიმპიადის ლიცენზია რეპეშაჟში გადართვამდე გაინაღდა, ნახევარფინალამდე მისვლით. ძირითად ბადეში მან არგენტინელი იური ალექსეი ჰორაციო მაიერი (10:0), კანადელი არჯუნ სინხ გილი (5:3) და სამხრეთკორეელი ჯაეგანგ კიმი (4:2) ჩამოიშორა და ფინალის საგზურისთვის ბრძოლაში რუსეთის ნაკრების წევრ აბდუსალიმ გადისოვთან წააგო (2:7).

გუშინვე, მსოფლიო კონკურენციაში არაოლიმპიურ წონით კატეგორიაში – 61 კილოგრამში მოჭიდავე ბექა ლომთაძეც ჩაება. ევროპის წლევანდელი პირველობის ქართველმა ფინალისტმა პირველ წრეში ფილიპინელი კრისტიან ეტპისონ ნიკოლესკუ დაჩაგრა (12:0). მერვედფინალში სამხრეთკორეელ ჯაეონ იანგს 6:4 სძლია. ძირითად ბადეში გამოსვლა კი მეოთხედფინალში დაასრულა, მონღოლ ნომინ ბატბოლდთან მარცხით (5:10).

ამ შეხვედრის შემდეგ ლომთაძე "ბრინჯაოს ნახევარფინალში” გადაერთო და ინდოელ ბაირანგ ბაირანგთან 6:13 წააგო.

დღეს საღამოს ხალიჩაზე დარჩენილ ოთხ წონით კატეგორიაში მოჭიდავე თავისუფლები გავლენ. საქართველოს ნაკრების წევრთაგან საქმეში ვლადიმერ ხინჩეგაშვილი (57 კგ), დავით ტლაშაძე (70 კგ), ჯუმბერ ყველაშვილი (74 კგ) და გენო პეტრიაშვილი (125 კგ) ჩაერთვებიან.