გერმანიის ფეხბურთელთა ეროვნული გუნდის მთავარი მწვრთნელის იოახიმ ლიოვის თქმით, ის ფაქტი, რომ ჯგუფში ლიდერები არ არიან, გარკვეულწილად ახარებს კიდეც. ამის შესახებ მან ევრო-2016-ის შესარჩევ ციკლში პოლონეთის ნაკრებთან საშინაო მატჩამდე განაცხადა.

“წინა წლებთან შედარებით სხვა მდგომარეობაში ვართ. ამჟამად, ჯგუფს არ ვლიდერობთ. თუმცა, სიტუაცია რომელშიც აღმოვჩნდით მახარებს კიდეც, რადგან გადამწყვეტ მატჩებში წარმატებით თამაშს გვაიძულებს. ეს მეორეხარისხოვანი ამოცანა არაა და კიდევ უფრო მეტ მოტივაციას გვმატებს.

პოლონეთს ფინალურ ეტაპზე გასვლის საუცხოო შანსი აქვს. პოლონელების ტაქტიკა გასაგებია. განვლილ მატჩებში, გიბრალტარის გამოკლებით, ისინი ბურთს მეტოქეს “აძლევდნენ”. ინიციატივას განზრახ თმობდნენ და ბურთს რომ მოიპოვებდნენ, მაშინვე სახიფათოდ უტევდნენ. ბურთის ფლობის დროს ეს უნდა გვახსოვდეს” – იუწყება ლიოვის სიტყვებს უეფას ოფიციალური ვებგვერდი.