საქართველოსა და შოტლანდიის ფეხბურთელთა ეროვნული გუნდები არსებობის ისტორიაში ერთმანეთს სამჯერ შეხვედრიან. ისინი ერთმანეთის პირისპირ ორჯერ ევროპის 2008 წლის ჩემპიონატის შესარჩევ ციკლში წარსდგნენ, ხოლო ერთხელ -ევროპის 2016 წლის პირველობის.

შოტლანდიელებს დღემდე “გველის ნაკბენივით” ახსოვთ 2007 წლის 17 ოქტომბერს “ბორის პაიჭაძეზე” 0:2 წაგებული მატჩი, რითაც ჯგუფში მეორე ადგილის დაკავებისა და პლეი ოფში გასვლის რეალური შანსი დაკარგეს. გამარჯვების შემთხვევაში ალექს მაკლიშის შეგირდები ევრო-2008-ზე თამაშთან ძალიან ახლოს იყვნენ. მაშინ, შოტლანდიელთა კარი ლევან მჭედლიძემ და დავით სირაძემ აიღეს.

ხსენებულ შესარჩევში ქართველებმა გლაზგოში “ჰემპდენ პარკზე” პირველი შეხვედრა 1:2 წააგეს. სტუმართაგან ერთადერთი ბურთი შოთა არველაძემ გაიტანა, როდესაც 41-ე წუთზე ქართველებმა ანგარიში გაათანაბრეს. სხვათა შორის, არველაძისთვის ეს ეროვნული გუნდის მაისურით გატანილი ბოლო გოლი აღმოჩნდა. 1992-2007 წლებში მან ნაკრების ღირსება 61 მატჩში დაიცვა და 26 გოლი გაიტანა. ის ეროვნული გუნდის არსებობის ისტორიაში საუკეთესო ბომბარდირია.

ევრო-2008 წლის შესარჩევში გუნდს გერმანელი კლაუს ტოპმიოლერი ხელმძღვანელობდა და ქართველები 6 გუნდში (საფრანგეთი, იტალია, შოტლანდია, უკრაინა, საქართველო, ფარერები) მე-5 ადგილზე გავიდნენ.

ევრო-2016-ის შესარჩევში შოტლანდიასთან გლაზგოში ჩატარებულ შეხვედრაში მასპინძლებმა მინიმალური სხვაობით გაიმარჯვეს. ერთადერთი გოლი საკუთარ კარში ქართველთა ცენტრალურმა მცველმა აკაკი ხუბუტიამ გაიტანა. ხსენებულ მატჩში საქართველოს ეროვნულ გუნდს თემურ ქეცბაია ხელმძღვანელობდა.

ამჯერად, შოტლანდიელებთან გუნდს კახა ცხადაძე გაიყვანს. ორწლიანი პაუზის მერე, ნაკრებს მცველი ზურაბ ხიზანიშვილი დაუბრუნდა, რომელიც 2007 წელს თბილისში მოგებულ მატჩში ერთ-ერთი საუკეთესო იყო. მაშინდელი შემადგენლობიდან დღესდღეობით მასპინძელთა რიგებში ხიზანიშვილის გარდა, მეკარე გიორგი მაკარიძე, ნახევარმცველები ლევან ყენია და ჯაბა კანკავა, ასევე, თავდამსხმელი ლევან მჭედლიძე არიან.

საქართველო- შოტლანდიის შეხვედრა დღეს, ბორის პაიჭაძის სახელობის “დინამო არენაზე” შედგება და 20:00 საათზე დაიწყება. მთავარი მსაჯი რუმინელი ოვიდიუ ჰატეგანია, რომელსაც თანამემამულეები ოქტიავიან სოვრე და სებასტიან გეორგე დაეხმარებიან.

გაგაცნობთ ქართველებისა და შოტლანდიელების განვლილი სამი დაპირისპირების სტატისტიკურ მონაცემებს:

ევროპის 2008 წლის ჩემპიონატის შესარჩევი ციკლი

შოტლანდია-საქართველო 2:1 (1:1)

2007 წელი. 24 მარტი. გლაზგო. “ჰემპდენ პარკი”. 50850 მაყურებელი.

შოტლანდია: გორდონი, ალექსანდერი, ვეირი, მაკმანუსი, ნეისმიტი, ტილი (ბრაუნი, 60), ფერგიუსონი, ჰარტლი, მაკალოჰი, მილერი (მელონი, 90+2), ბოიდი (ბიტი, 76).

მთავარი მწვრთნელი: ალექს მაკლიში.

საქართველო: ლომაია, შაშიაშვილი, ხიზანიშვილი, სალუქვაძე, ელიავა, ბურდული (სირაძე, 57), მენთეშაშვილი (გოგუა, 46), ცქიტიშვილი (მუჯირი, 90+2), კობიაშვილი (კ), დემეტრაძე, შოთა არველაძე.

მთავარი მწვრთნელი: კლაუს ტოპმიოლერი (გერმანია).

გოლები: ბოიდი (11), არველაძე (41), 2:1 ბიტი (89).

გაფრთხილებები: მენთეშაშვილი (11), სალუქვაძე (62), დემეტრაძე (85), ფერგიუსონი (90+3).

მთავარი მსაჯი: ნიკოლა ვოლკარცი (დანია).

საქართველო – შოტლანდია 2:0 (1:0)

2007 წელი. 17 ოქტომბერი. თბილისი. ბორის პაიჭაძის სახელობის სტადიონი. 400000 მაყურებელი.

საქართველო: მაკარიძე, სალუქვაძე, ხიზანიშვილი (კ), ასათიანი, შაშიაშვილი, მენთეშაშვილი, კანკავა, ყენია (კანდელაკი, 79), დავით კვირკველია, მჭედლიძე (კვახაძე, 85), სირაძე (ჯაკობია, 89).

მთავარი მწვრთნელი: კლაუს ტოპმიოლერი (გერმანია).

შოტლანდია: გორდონი, მარტი, ვეირი, მაკმანუსი, ალექსანდერი, მელონი, ფლეჩერი, ფერგიუსონი, პირსონი (ბოიდი, 66), მილერი (ბიტი, 66), მაკფადენი.

მთავარი მწვრთნელი: ალექს მაკლიში.

გოლები: მჭედლიძე (16), სირაძე (64).

გაფრთხილებები: კანკავა (61), მაკმანუსი (61), ბიტი (72), ასათიანი (90+5).

მთავარი მსაჯი: კნუტ კირხერი (გერმანია).

ევროპის 2016 წლის ჩემპიონატის შესარჩევი ციკლი

შოტლანდია – საქართველო 1:0 (1:0)

2014 წელი. 11 ოქტომბერი. გლაზგო. “აიბროქსი”.

შოტლანდია: მარშალი, მარტინი, ჰენლი, რობერტსონი, ჰატონი, ანია, მელონი, ბრაუნი, მორისონი, ს.ფლეტჩერი (მარტინი 90), მორისონი, ნეისმიტი (მაკარტური 80).

მთავარი მწვრთნელი: გორდონ სტრაჩანი.

საქართველო: ლორია, ხუბუტია, სოლომონ კვირკველია, დავით კვირკველია (ოქრიაშვილი, 46), ლობჟანიძე, გრიგალავა, კანკავა, დაუშვილი, პაპავა (ძარია, 70), ყაზაიშვილი (ჭანტურია, 80), გელაშვილი.

მთავარი მწვრთნელი: თემურ ქეცბაია.

გოლი: 1:0 ხუბუტია (28 ს.კ).

გაფრთხილებები: მორისონი (33), გრიგალავა (49), დაუშვილი (53), მელონი (68).

მთავარი მსაჯი: მიროსლავ ზელინკა (ჩეხეთი)