საქართველოს 21-წლამდე ფეხბურთელთა ნაკრები 2017 წლის ევროპის ჩემპიონატის შესარჩევი ეტაპის მეორე მატჩში კოპროვინიცაში, გრადსკის სტადიონზე, მასპინძელ ხორვატიასთან მინიმალური სხვაობით დამარცხდა.

ალექსანდრე ჩივაძის შეგირდებმა პირველი ტაიმი სუსტად ჩაატარეს და ხორვატებმაც რამდენიმედან ერთ-ერთი სახიფათო მომენტი გოლად აქციეს - 23-ე წუთზე პატარა “ჯვაროსნების” დაცვა ჩავარდა და ბექა ქურდაძე მილიჩის ახლო მანძილიდან დარტყმულს ვერ გაუმკლავდა. უნდა აღინიშნოს, რომ “საბურთალოს” კარის დარაჯმა პირველ 45 წუთში ნაკრები გაშვებული გოლისგან რამდენჯერმე იხსნა.

შესვენების შემდეგ ქართველი ფეხბურთელები უკეთ ათამაშდნენ, ტემპს უმატეს, სათამაშო უპირატესობას დაეუფლნენ და მომენტებიც შექმნეს, მაგრამ რეალიზებაში მოიკოჭლებდნენ. წონასწორობის აღდგენის შანსი მალევე გაჩნდა, მაგრამ მათე კვირკვია თერთმეტმეტრიანის ნიშნულთან მარჯვენა ფლანგიდან ჩაწოდებულ ბურთს ხეირინად ვერ მიწვდა. არადა, მეკარე უკვე საპირისპირო მიმართულებით მოძრაობდა და ის საკუთარ გუნდს ვერ უღარ უშველიდა. ქართველები ხიფათს ფლანგებიდან ქმნიდნენ და 71-ე წუთზე გიორგი ხარაიშვილმა თავიდან კარგად ითამაშა, მაგრამ გურამ გოშთელიანის მისამართით გაკეთებულმა გადაცემამ არ ივარგა.

ხორვატები კონტრშეტევაზე ეძებდნენ ბედს და 76-ე წუთზე მეორე გოლის გატანის შანსი მიეცათ, თუმცა მეკარესთან პირისპირ დარჩენილმა შემტევმა კარს ოდნავ ააცილა, ერთ წუთში კი, კოლარის გოლი მსაჯმა სამართლიანდ გააუქმა - ის თამაშგარე მდგომარეობაში იყო. ამრიგად, საქართველოს ნაკრები 0:1 დამარცხდა და შემდეგ მატჩში 7 ოქტომბერს, ესპანეთის ნაკრებს უმასპინძლებს.

ხორვატია - საქართველო 1:0 (1:0)

ხორვატია: ლივაკოვიჩი, მიკანოვიჩი, ა. მილიჩი, რადოშევიჩი, კოლინგერი, ჰალილოვიჩი (ვლაშიჩი 65), როგი, კორიჩი (კროვინოვიჩი 56), პაშალიჩი, კოლარი (ბრლეკი 89), კალეტა-კარი.

საქართველო: ქურდაძე, დვალი, გადრანი (ენდელაძე 79), უბილავა, ცინცაძე, აბურჯანია, პაპუნაშვილი, კაჭარავა (გოშთელიანი 46), კიტეიშვილი (ხარაიშვილი 46), ცნობილაძე, კვირკვია.

გოლი: 1:0 მილიჩი (23)

გაფრთხილება: ჰალილოვიჩი (53), რადოშევიჩი (58) - დვალი (30), ცნობილაძე (40), აბურჯანია (49), ხარაიშვილი (70), კვირკვია (90+1)