“მანჩესტერ იუნაიტედის” ესპანელი მეკარე დავიდ დე ხეა მადრიდის “რეალში” ჩაშლილი ტრანსფერის შემდეგ რთულ სიტუაციაში აღმოჩნდა.

AS-ის ცნობით, 24 წლის ფეხბურთელს რთული არჩევანის გაკეთება მოუწევს: “წითელ ეშმაკებთან” კონტრაქტის გახანგრძლივების შემთხვევაში, მისი “სამეფო კლუბში” გადასვლა კიდევ დიდი ხნით გადაიდება, ხოლო წინააღმდეგ შემთხვევაში დიდი შანსია ევრო-2016 გამოტოვოს.

გავრცელდა ინფორმაცია, რომ ინგლისური გრანდის მთავარი მწვრთნელი ლუი ვან გაალი დე ხეას მანამ არ ათამაშებს, სანამ ის კლუბთან კონტრაქტის გახანგრძლივებას არ დათანხმდება, რომელსაც ვადა 2016 წლის ივნისში გასდის. პარალელურად, ესპანეთის ნაკრების მთავარმა მწვრთნელმა ვისენტე დელ ბოსკემ განაცხადა, რომ დავიდს ნაკრებში მხოლოდ იმ შემთხვევაში გამოიძახებს, თუ სათამაშო პრაქტიკა ექნება.

AS-ის მტკიცებით, მეკარის აგენტი ხორხე მენდესი უკვე გაემგზავრა მანჩესტერში და “იუნაიტედის” წარმომადგენლებთან ისეთი შეთანხმების მიღწევას ეცდება, რომელიც ყველა მხარისთვის მისაღები იქნება.