საქართველოში ყველაზე დიდი სარაგბო ბაზა "აია არენა" ქუთაისში ოფიციალურად გაიხსნა. სპორტული კომპლექსი სპორტისა და ახალგაზრდობის საქმეთა მინისტრმა გახსნა.

ბაზა ევროპული სტანდარტების გათვალისწინებით მოეწყო და მის მშენებლობაზე 11 მლნ ლარი დაიხარჯა. ბაზაზე განთავსებულია 4 მოედანი, 3 სათამაშო და 1 სავარჯიშო. ცენტრალური სტადიონი 4 860 მაყურებელზეა გათვლილი, მეორე მოედანი 1 330 მაყურებელს იტევს, მესამე სტადიონი კი 751 ადგილიანია. კომპლექსი აღჭურვილია საკონფერენციო, სატრენაჟორო და მოსასვენებელი ოთახებით, მატჩის კომისრის ლოჟებით, ექიმისა და დოპინგ-კონტროლის კაბინეტებით. მიმდინარეობს სასტუმროს მშენებლობა.

"აია არენას" ტერიტორია მოიცავს 9 ჰექტარს და საქართველოს მასშტაბით ყველაზე დიდი სარაგბო ბაზაა. ქუთაისის სარაგბო ბაზა საქველმოქმედო ფონდ "ქართუს" დაფინანსებით, ასოციაცია "ატუმ" მოაწყო.

1tv.ge

სპორტის სამინისტროს პრესსამსახურის ფოტოები