მსოფლიოს ნომერ პირველმა ჩოგბურთელმა, სერბმა ნოვაკ ჯოკოვიჩმა ცინცინატის მასტერსის (საპრიზო ფონდი 3 200 000 ამერიკული დოლარი) 1/4-ფინალში შვეიცარიელი სტანისლას ვავრინკა იოლად, ორ სეტში 6:4, 6:1 დაამარცხა. შეხვედრამ საათსა და 5 წუთს გასტანა. სერბმა 4 ეისი ჩააწოდა და 2 ორმაგი შეცდომა დაუშვა, შვეიცარიელს 4 ეისი და ერთი ორმაგი შეცდომა ჰქონდა. ნოვაკმა 4 ბრეიკი შეასრულა, ისე რომ სტანისლასს ბრეიკ-პოინტიც კი არ ჰქონია.

ჯოკოვიჩი ცინცინატის ტურნირის ნახევარფინალში ბერდიხ-დოლგოპოლოვის წყვილის გამარჯვებულს შეხვდება.

შეგახსენებთ, რომ ვავრინკამ წლევანდელ “როლან გაროსის” ფინალში ჯოკოვიჩი დაამარცხა და ბალკანელს საოცნებო ტიტული წაართვა.