რუსეთის საფეხბურთო პრემიერლიგის მე-3 ტურში, მოსკოვის “სპარტაკმა”, რომელშიც ჯანო ანანიძე გამოდის, თავის მოედანზე ყაზანის “რუბინი” დაამარცხა (1:0), რომლის ღირსებას სოლომონ კვირკველია იცავს.

საქართველოს ეროვნული ნაკრების შემტევი ნახევარმცველი სასტარტო შემადგენლობაში იყო და 55-ე წუთზე შეცვალეს. “სპარტაკის” ახალი მთავარი მწვრთნელი დმიტრი ალეინიჩევი მას წყალობს და საწყისი წუთებიდან უკვე მეორედ ათამაშა, ხოლო ერთხელ შეცვლაზე შეიყვანა. მოსკოველთაგან ერთადერთი გოლი მე-60 წუთზე იურა მოვსისიანმა გაიტანა. ცენტრალურ მცველ კვირკველიას “რუბინში” ტრავმის გამო არ უთამაშია.

“სპარტაკი” 7 ქულით 16 გუნდში მეოთხეა, ხოლო “რუბინს” რაოდენ მოულოდნელიც არ უნდა იყოს, ჯერ ქულაც არ აუღია.

ესტონეთის მეისტრილიგის 27-ე ტურში, ტალინის “ფლორამ” გასვლაზე სილამაეს “კალევს” 1:0 აჯობა. შემტევი ნახევარმცველი ზაქარია ბეგლარიშვილი ტალინელთა სასტარტოში იმყოფებოდა და 81-ე წუთზე შეცვალეს. “ფლორას” 48 ქულა აქვს და 10 გუნდში მეორეა.