კატალონიური “ბარსელონას” ნახევარმცველი ანდრეს ინიესტა International Champions Cup-ზე “ფიორენტინასთან” 1:2 წაგებულ შეხვედრაში დაშავდა.
31 წლის ფეხბურთელმა ტრავმა პირველ ტაიმში მიიღო და შესვენებისას შეცვალეს. კატალონელთა მთავარი მწვრთნელის, ლუის ენრიკეს განცხადებით, ინიესტას ტრავმა სერიოზული ხასიათის არაა, თუმცა, დღეს მას დამატებითი სამედიცინო გამოკვლევა უნდა ჩაუტარდეს და მოედანზე დაბრუნების ზუსტი ვადებიც ამის შემდეგ გახდება ცნობილი.
ამრიგად, ინიესტას თბილისში ჩამოსვლა და ევროპის სუპერთასზე “სევილიას” წინააღმდეგ თამაში კითხვის ნიშნის ქვეშაა. პრაქტიკულად გადაწყვეტილია, რომ ის გუნდს უახლოეს მატჩში, გამპერის თასზე “რომას” წინააღმდეგ ვერ დაეხმარება.
