ასეთ წარმატებაზე დღის დასაწყისში ქართული ძიუდოს ყველაზე ოპტიმისტი ქომაგებიც ვერ იფიქრებდნენ. საქართველოს გოგონათა ნაკრების ორივე წევრი, რომლებიც თბილისი 2015-ის ევროკონკურენციაში დღეს ჩაება, პოდიუმის უმაღლეს საფეხურზე ავიდა. ძიუდოს ოლიმპიურ მონაგარს თავისი წილი ოქროები მზია ბებოშვილმა (52 კგ) და ეთერ ლიპარტელიანმა (57 კგ) შემატეს.

ბებოშვილმა, რომელიც ტურნირზე ევროპის მოქმედი ჩემპიონის რანგში გამოდიოდა, ფინალის გზაზე სამი მეტოქე ჩამოიშორა. ბრიტანელ აიმე გრანტსა და მოლდოველ ანა როტარის იპონებით გასცდა, ნახევარფინალში კი რუსეთის ნაკრების წევრ ნასიბა იბრაგიმოვას უილეთო შეხვედრაში შიდოებით 2:1 აჯობა. საჩემპიონო გამარჯვება კი ჰოლანდიელ ილსე ბურენის შებოჭვით მოიპოვა.

ეთერ ლიპარტელიანმა ტურნირი ჩეხი ვერა ზემანოვას ძლევით გახსნა – მეტოქეს ოთხ წუთში სამი იუკო აუღო. მაკედონიელი ამრა ფეიზულა და რუსი დანა ნაგუშევა შებოჭვით ჩამოიშორა. ნახევარფინალში ფინელ ემილია კანერვას იუკოთი სძლია. გადამწყვეტი გამარჯვება კი პოლონელ ანა დაბროვსკასთან მოიპოვა, მეოთხე წუთზე შესრულებული ულამაზესი სუფთა გდებით.

დღესვე, დიღმის აკადემიის ტატამზე ევროპის მოქმედი ჩემპიონი ლაშა დუდაშვილიც გავიდა, მაგრამ საპრიზო სამეულს მიღმა დარჩა.

ხვალ კი მედლების მორიგი სამი კომპლექტი გათამაშდება: გოგონებში 63 და 70 კილოგრამ წონით კატეგორიებში, ხოლო ვაჟებში – 81 კილოგრამში. საქართველოს დროშის ქვეშ იჭიდავებენ: ნათია მიქაბერიძე (63 კგ) და გოგა ქევხიშვილი (81 კგ).

წინასწარი ეტაპის შეხვედრები დილის 11 საათზე დაიწყება.

ძიუდო

თბილისი 2015

30 ივლისი

გოგონები

52 კგ

1 მზია ბებოშვილი (საქართველო)

2 ილსე ბურენი (ჰოლანდია)

3 ირემ კორკმაზი (თურქეთი)

3 ნებისა იბრაგიმოვა (რუსეთი)

57 კგ

1 ეთერ ლიპარტელიანი (საქართველო)

2 ანა დაბროვსკა (პოლონეთი)

3 ემილია კანერვა (ფინეთი)

3 დანა ნაგუჩევა (რუსეთი)

ვაჟები

73 კგ

1 ჰასილ ჯაფაროვი (აზერბაიჯანი)

2 რაზვან ჩიოლანი (რუმინეთი)

3 ვასილი ბალამპანაშვილი (საბერძნეთი)

3 ლუკას ვიტვერი (შვეიცარია)