საფეხბურთო კლუბი “ზესტაფონი” პირველ ლიგიდან მოკვეთეს. სფფ-ს აღმასკომის გადაწყვეტილებით “ზესტაფონის” ნაცვლად პირველ ლიგაში წალენჯიხის “სქური” ითამაშებს. “ზესტაფონის”პირველი ლიგიდან მოხსნის შესახებ worldsport.ge სფფ-ს იურისტ კესო ჩხიკვაძეს ესაუბრა.

“საფეხბურთო კლუბ ზესტაფონს” თამაზ ოდიკაძისთვის გასახდელი აქვს სახელფასო დავალიანება. სწორედ ამ მიზეზის გამო კლუბს ჩამოერთვა პირველ ლიგაში თამაშის უფლება. “ზესტაფონის” წარმომადგენლებს არ წარმოუდგენიათ ოდიკაძისადმი დავალიანების გადახდის დოკუმენტი” – განაცხადა კესო ჩხიკვაძემ.

“ზესტაფონის” პრესამსახურის ხელმძღვანელმა სერგო ფუტკარაძემ worldsport.ge-სთან სხვაგვარი რამ თქვა.

“უცნაური ვითარებაა. პირველი ლიგიდან ჩვენი კლუბის მოხსნა თამაზ ოდიკაძის საქმემ განაპირობა. ოდიკაძე ჩვენი კლუბიდან “გაგრაში” წავიდა სამუშაოდ, სფფ-ს გადაწყვეტილებით კლუბს ფეხბურთელის მიმართ თანხის გადახდა დაეკისრა, რასაც “ზესტაფონი” კატეგორიულად არ ეთანხმებოდა, თუმცა საფეხბურთო კლუბმა “ზესტაფონმა” სანციების თავიდან ასარიდებლად დაკისრებული 7 000 აშშ დოლარი გადაიხადა. გამომდინარე იქიდან, რომ ჩვენთვის უცნობი იყო თამაზ ოდიკაძის რეკვიზიტები, “ზესტაფონმა” თანხა სფფ-ს ჩაურიცხა.

შემდგომ ამისა, სფფ-მ განმარტებისთვის საფეხბურთო ტრიბუნალს მიმართა, რომელსაც განმარტება 10 დღის ვადაში უნდა გაეკეთებინა, თუმცა ტრიბუნალმა კანონიერი ჩარჩოები დაარღვია და განმარტება 10 დღის შემდეგ გააკეთა. საფეხბურთო ტრიბუნალის გადაწყვეტილებით “ზესტაფონს” 7 000 აშშ დოლარის გარდა უნდა გადაეხადა საშემოსავლო გადასახადი, თუმცა სფფ-ს ჩვენთვის ამგვარი ტიპის მოთხოვნა არ დაუწესებია. დოკუმენტში აღნიშნული უნდა ყოფილიყო საშემოსავლო თანხაც, თუმცა იქ მხოლოდ 7 000 აშშ დოლარი იყო დაფიქსირებული. ამიტომაც “ზესტაფონმა” კანონით იხელმძღვანელმა და მხოლოდ 7 000 აშშ დოლარი გადაიხადა.

ტრიბუნალის გადაწყვეტილებით გადარიცხული 7 000 აშშ დოლარი საფეხბურთო კლუბს დაუბრუნდა, რის შემდეგაც კლუბი პირველი ლიგიდან მოიხსნა. შემიძლია თამამად ვთქვა, რომ საფეხბურთო კლუბ “ზესტაფონის” მიმართ რეპრესიული ღონისძიებები მიმდინარეობს” – განაცხადა სერგო ფუტკარაძემ.

შეგახსენებთ საფეხბურთო კლუბ “ზესტაფონის” ნაცვლად პირველ ლიგაში “სქური” ითამაშებს. გასული შედეგების მიხედვით “სქური” პირველი ლიგიდან დაქვეითდა, თუმცა “ზესტაფონის” ნაცვლად შემდეგ სეზონშიც პირველ ლიგაში ითამაშებს. აღმასკომმა უპირატესობა გავარდნილ წალენჯიხელებს მიანიჭა და არა მეორე ლიგის საფლეიოფო მატჩში დამარცხებულ “ცხუმს”.