საქართველოს ენერგეტიკის მინისტრმა კახა კალაძემ primetimenews.ge თვის მიცემულ ინტერვიუში სფფ-ს პრეზიდენტი თანხების არამიზნობრივ ხარჯვაში დაადანაშაულა. კალაძემ საინტერესო შედარება გამოიყენა ფეხბურთის ფედერაციაზე საუბრისას, პოლიტიკოსმა ქართული ფეხბურთის მართველი ორგანო ჭაობს შეადარა.

“სახელმწიფო უნდა ჩაერიოს არჩევნებში. თუ არ ჩაერევა, ეს იქნება დანაშაული და პრობლემა. ყოველწლიურად სახელმწიფო 40 მილიონზე მეტს ხარჯავს ქართულ ფეხბურთში. დღეს ეტყობა ქართულ ფეხბურთს, რომ 40 მილიონი ლარი იხარჯება?”- განაცხადა კალაძემ.

საქართველოს ეროვნული ნაკრების ყოფილმა კაპიტანმა სხვა თემაზეც ისაუბრა. მისი თქმით სახელმწიფო უნდა ჩაერიოს სფფ-ს არჩევნებში, რაზეც ზვიად სიჭინავამ გაამახვილა ყურადღება.

“კახა კალაძემ თავისი ინტერვიუში აღიარა, რომ სახელმწიფო სფფ-ს საქმიანობაში უნდა ჩაერიოს.

მაქვს სამი უდიდესი სკოლა გავლილი: ზუგდიდის მეოთხე საშუალო სკოლა, ავღანეთი და 90-იანი წლების რუსეთი. ამიტომ მგონია, რომ ჩემი შეშინება ცოტა გაუჭირდებათ” - განაცხადა ზვიად სიჭინავამ რუსთავი 2-სთვის მიცემულ ინტერვიუში. სფფ-ს პრეზიდენტმა ასევე აღნიშნა, რომ მზადაა გამოძიებასთან სათანამშრომლოდ.

ამ თემაზე კომენატრი გააკეთა სფფ-ს პრეზიდენტობის სავარაუდოდ კანდიდატმა ლევან კობიაშვილმა.

“სახელმწიფოდან მიღებული თანხები არამიზნობრივად დაიხარჯა. რა მნიშვნელობა აქვს სფეროს?

სისტემასთან დაკავშირებით ბევრი კითხვები არსებობს, მაგრამ კარგი იქნება სხვა საკითხებზეც გაკეთდეს აქცენტი. მაგალითად, რატომ არ ვიცით დღემდე არჩევნების თარიღი?– აღნიშნა ლევან კობიაშვილმა რუსთავი 2-თან საუბარში.

სპორტისა და ახალგაზრდობის მინისტრის ტარიელ ხეჩიკაშვილის აზრით ფეხბურთის განვითარება სახელმწიფოს გარეშე შეუძლებელია, სფფ-ს საქმიანობაში სახელმწიფოს ჩარევაზე კი შემდეგი აზრი დააფიქსირა:

“აქ არ არის საუბარი იმ ტიპის ჩარევებზე, რაც წლების განმავლობაში ხდებოდა”- აღნიშნა ხეჩიკაშვილმა.

ზვიად სიჭინავამ სხვა თემაზეც ისაუბრა. კერძოდ, პრესაში გავრცელებული ინფორმაციით საქართველოს პროკურატურა ევროპის სუპერთასის 3 000 გაუჩინარებული ბილეთით დაინტერესდა.

“თქვეს რომ სახლში აქვსო. შეუძლიათ მოვიდნენ და ნახონ, მართლა არ მაქვს ბილეთები. ბილეთები რიგდება დადგენილი წესით კომპანიებსა და სტრუქტურებზე” – განაცხადა ზვიად სიჭინავამ.

სახელმწიფოს მხრიდან გაკეთებული განცხადება, მთავრობის სფფ-ს არჩევნებში ჩარევის შესახებ, ეწინააღმდეგება ევროპული ფეხბურთის მართველი ორგანოს დადგენილებას. სახელმწიფოს სფფ-ს საქმიანობაში ჩარევის უფლება არ აქვს. წინააღმდეგ შემთხვევაში ფეხბურთის ფედერაცია დაისჯება.

კალაძის განცხადებას, 40 მილიონ ლართან დაკავშირებით ნამდვილად აქვს გარკვეული საფუძველი, რადგან სახელმწიფოს მიერ დაფინანსებულ კლუბთა უმეტესობას არ გააჩნია განვითარების პროგრამა. მეტწილად მათი მიზანი ექვს თვეზე ან წელიწადზეა გათვლილი, გრძელვადიანი პროგრამის გარეშე კი კლუბის განვითარება შეუძლებელია. ამიტომაც სახელმწიფოს მხრიდან ლოგიკურია უკმაყოფილობის განცდა გაცემულ თანხებთან დაკავშირებით.

მეორე მხრივ კლუბების მხრიდან თანხების არამიზნობრივ ხარჯვის შემთხვევაში სფფ-ს მხრიდან აუცილებელია კონტროლი, მაგრამ თუ პროფესიონალიზმის დაბალ დონესთან გვაქვს საქმე და არა ფინანსურ მაქინაციებთან, ამ შემთხვევაში სფფ-ს ბრალი მიზერულია.

ქართულ ფეხბურთში მწვავედ დგას პროფესიონალიზმის პრობლემა. ამიტომაც თუ არ დაიწყება საგანმანათლებლო პროგრამები, უმნიშვნელოა ვინ იქნება სფფ-ს პრეზიდენტი – ზვიად სიჭინავა, ლევან კობიაშვილი თუ რევაზ არველაძე.