იტალიის ჩემპიონმა ტურინის "იუვენტუსმა" ხორვატი ახალწვეული მარიო მანჯუკიჩი წარადგინა. მადრიდის "ატლეტიკოს" ყოფილი ფორვარდი ტურინულ გრანდში 17 ნომრიანი მაისურით ითამაშებს.

მანჯუკიჩმა "იუვენტუსის" ფეხბურთელის რანგში პირველი კომენტარიც გააკეთა:

"მთავარი მნიშვნელობა მხოლოდ გატანილ გოლებს არ აქვს, უფრო მნიშვნელოვანი გამარჯვებაა და გუნდს ამისათვის ყველანაირად დავეხმარები. "იუვენტუსი" შესანიშნავი გუნდია და უკვე წლებია მომწონს. ბუფონს ხორვატია-იტალიის მატჩის წინ ვუთხარი, რომ ჩემი იდეალი ბავშვობიდან იყო. ენთუზიაზმით ვარ აღსავსე ამ გუნდში სათამაშოდ.

ჩემპიონთა ლიგის ფინალს ვუყურე და "იუვეს" გამარჯვება შეეძლო, თუმცა ნაკლებად გაუმართლა.

მარიო გიოტცე? - მაღალის დონის ფეხბურთელი და ბრწყინვალე ადამიანია, კარგი იქნება მის გვერდით ისევ თამაში. პირლო და ტევესი რა თქმა უნდა, განსაკუთრებული ფეხბურთელები არიან, მაგრამ "იუვე" ყოველთვის მომავალზე ფიქრობს", - თქვა მანჯუკიჩმა.

29 წლის მანჯუკიჩი "იუვენტუსმა" "ატლეტიკოდან" 18 მილიონი ევროს სანაცვლოდ შეიძინა.