ქალთა შორის საქართველოს პირველმა ჩოგანმა სოფო შაფათავამ ჩეხეთის ქალაქ ოლომოუცში მიმდინარე 50-ათასიანი ტურნირის პირველ რაუნდში ხორვატ ემა მიკულჩიჩს 6:2, 6:1 სძლია და მერვედფინალში გააღწია, სადაც მე-7 რეიტინგის მქონე ჩეხ კატერინა ვანკოვას გაეჯიბრება.

წყვილებში შაფათავას და პოლონელ მაგდალენა ფრეჩს მე-4 განთესვა გააჩნდათ, თუმცა, ჩეხებს – მუჩოვას და სტეფკოვას ვერ გაუმკლავდნენ.

გერმანულ აშაფენბურგში 25-ათასიან ტურნირზე პირველი წრე დასძლია სოფო ქვაცაბაიამ. მან სლოვენიელ დალილა იაკუპოვიჩს 7:5, 4:6, 7:5 სძლია და მერვედფინალში ბულგარელ ტერზისკას და გერმანელ ზანდერს შორის უმჯობესს გაეჯიბრება.

რაც შეეხება ეკატერინე გორგოძეს, მან საწყის რაუნდში კვალიფიკაციის ერთ-ერთ გამარჯვებულ – ხორვატ ტენა ლუკაშთან 1:6, 6:7 (2:7) წააგო.

წყვილებში ქართველ გოგონებს პირველი განთესვა გააჩნიათ და პირველ შეხვედრას გერმანული დუეტის (ენგელმანი-პრენკოვიჩი) წინააღმდეგ ჩაატარებენ.