საქართველოს ვიცე-ჩემპიონ ბათუმის "დინამოსთვის" ევროსარბიელზე 17 წლის შედგომ დაბრუნება წარუმატებელი გამოდგა. ზღვისპირელებმა ევროპა ლიგის განმეორებითი მატჩი ნიქოზიის "ომონიასთან" ორბურთიანი სხვაობით წააგეს და ვინაიდან პირველი შეხვედრა მინიმალური ანგარიშით ჰქონდათ მოგებული ასპარეზობას გამოეთიშნენ.

პირველი ტაიმი "დინამოსთვის" სასურველი შედეგით დასრულდა, თუმცა მეორე ტაიმის დასაწყისში შოთა ჭეიშვილის გუნდი კაცნაკლული დარჩა. მატჩის პორტუგალიელმა მთავარმა მსაჯმა ფაბიო ვერსიმომ მოედნიდან ბადრი ტეტუნაშვილი გააძევა. ათკაციანმა "დინამომ" კი კვიპროსელთა დაწოლას ვერ გაუძლო და 5-წუთიან ინტერვალში ორი გოლი გაუშვა. დარჩენილ ნახევარ საათში კი ბათუმელებმა გოლის გატანა ვერ შეძლეს, იმ გოლის, რომელიც მათ შემდგომ ეტაპზე გაიყვანდა. შესაბამისად, ბათუმის "დინამომ" ორი მატჩის ჯამში 1:2 წააგო და ევროპული ვოიაჟი ნაადრევად დაასრულა.

აღსანიშნავია, რომ მატჩის პირდაპირი ტრანსლირება "აჭარის" ტელევიზიას უნდა მოეხდინა, თუმცა შეხვედრა ეთერში არ გასულა. როგორც ტელევიზიის წარმომადგენლებმა განმარტეს კვიპროსიდან სიგნალი არ მოსულა, რისი მიზეზებიც ჯერჯერობით გაურკვეველია...

"ომონია" - "დინამო" 2:0 (0:0) (ორი მატჩის ჯამში - 2:1) VIDEO

"ომონია": პანაი, ლობჟანიძე, შერიდანი, რამოსი, ასისი (პერესი 88), ეკონომიდესი, შკემბრი (ოკეიე 79), მარგასა, კირმი (ფოფანა 46), რუნიე, გულონი

მწვრთნელი: კოსტას კაიფასი

"დინამო": ალავიძე, ტეტუნაშვილი, ქავთარაძე (ჩირიკაშვილი 80), გოგიტიძე, შონია, ფონიავა (ვარშანიძე 54), მახარაძე, ბერიაშვილი, სუხიაშვილი, გაბედავა, ტატანაშვილი (ქორიძე 59)

მწვრთნელი: შოთა ჭეიშვილი

გოლები: 1:0 გულონი (56), 2:0 შკემბრი (61)

გაძევება: ტეტუნაშვილი (55)

მსაჯი: ფაბიო ვერსიმო (პორტუგალია)