საქართველოს ძიუდოისტთა ნაკრების წევრებს ნუგზარ ტატალაშვილსა (73 კგ) და ავთანდილ ჭრიკიშვილს (81 კგ) ფინალის საგზურს თითო გამარჯვება აშორებთ.

ტატალაშვილი საქმეში მეორე წრიდან ჩაერთო, სადაც ფრანგ ფლორენ ურანის დაუპირისპირდა და უილეთო ბრძოლაში ერთი შიდოს უპირატესობით (1:2) აჯობა. მერვედფინალში სერბი ლიუბისა კოვაჩევიჩი მე-5 წუთზე შებოჭა. მეოთხედფინალში კი ორი გაფრთხილებით აჯობა სლოვენიელ როკ დრაკშიჩს.

81 კილოგრამ წონით კატეგორიაში პირველ ნომრად განთესილი ავთანდილ ჭრიკიშვილიც სამი გამარჯვებით მივიდა ნახევარფინალამდე. ბულგარელი ივაილო ივანოვისა და ესტონეთის ნაკრების წევრ ევგენი სალეევის იპონ-იპონ ძლევის შემდეგ, ევროპის და მსოფლიოს ქართველმა ჩემპიონმა ბელარუს ალექსანდრ სტიაშენკასაც ვადაზე ადრე მოუმთავრა საქმე – მეოთხე წუთის დასაწყისში მსაჯს მეოთხედ გააფრთხილებინა.

ნახევარფინალში ტატალაშვილი ბელგიელ დირკ ვან ტიჩელტს დაუპირისპირდება. ჭრიკიშვილის მეტოქე კი რუსეთის ნაკრების წევრ ალან ხუბეცოვსა და გერმანელ სვენ მარეხს შორის მოგებული გახდება.

ვასილ მშვილდაძე ბაქოდან