ბაქოში მიმდინარე ევროპის პირველ თამაშებზე საქართველოს ნაკრების წევრებმა ნუგზარ ტატალაშვილმა (73 კგ) და ავთანდილ ჭრიკიშვილმა (81 კგ) ორ-ორი ეტაპი დაძლიეს და მეოთხედფინალში გავიდნენ.

ტატალაშვილმა ფრანგ ფლორენ ურანის უილეთო ბრძოლაში ერთი შიდოს უპირატესობით (1:2) აჯობა. მერვედფინალში კი სერბი ლიუბისა კოვაჩევიჩი მე-5 წუთზე შებოჭა.

ჭრიკიშვილმა ბულგარელი ივაილო ივანოვი და ესტონეთის ნაკრების წევრი ევგენი სალეევი იპონ-იპონ ჩამოიშორა.

მეოთხედფინალში ნუგზარ ტატალაშვილის მეტოქე სლოვენიელი როკ დრაკშიჩი იქნება, ხოლო ავთანდილ ჭრიკიშვილი ბელარუს ალექსანდრ სტიაშენკას დაეჭიდება.

მარგიანმა ევროთამაშები სლოვაკი მატუს მილიჩოვსკის შებოჭვით გახსნა. მერვედფინალში კი გერმანიის ნაკრების წევრ ალექსანდერ ვიეჟერზაკთან მტკივნეულით წააგო.

დღესვე, აზერბაიჯანულ ტატამზე საქართველოს სახელით ლაშა შავდათუაშვილი (73 კგ), ესტერ სტამი და ნინო ოძელაშვილიც (ორივე 70 კგ) გავიდნენ, მაგრამ საწყის ეტაპზევე დამარცხდნენ და შეჯიბრებას გამოეთიშნენ.

ვასილ მშვილდაძე ბაქოდან