საქართველოს ძიუდოისტთა ნაკრების წევრმა ამირან პაპინაშვილმა ევროპის პირველ თამაშებზე ბრინჯაოს მედალი მოიპოვა.

60 კილოგრამ წონით კატეგორიაში მეორე ნომრად განთესილმა სპორტსმენმა ძირითად ბადეში გამოსვლა მერვედფინალში დაიწყო, ებრაელ არტიომ არშანსკისთან შეხვედრით და უილეთო ბრძოლაში ერთი გაფრთხილების უპირატესობით იმარჯვა (1:2). მეოთხედფინალშიც, ბოლო წამებამდე ერთადერთი შიდოთი სჯობნიდა ჰოლანდიელ ხეროენ მუურენს, მაგრამ საფინალო გონგამდე 14 წამით ადრე იუკოზე დავარდა და იქვე შებოჭვაზე მოჰყვა.

რეპეშაჟის ნახევარფინალში პაპინაშვილმა გერმანელ ტობიას ენგლმაიერთან გაცილებით თავისუფლად იჭიდავა და "ბრინჯაოს ფინალში” ვაზარ-იუკოთი გავიდა. იქ კი ესპანელ ფრანსისკო გარიგოსს იპონით მოუმთავრა საქმე.

მესამე საპრიზო ადგილის დაკავებით ამირან პაპინაშვილმა 160 სარეიტინგო ქულა გამოიმუშავა.

ვასილ მშვილდაძე ბაქოდან