რუსეთის დედაქალაქ მოსკოვში დაიწყო გამოჩენილი საჭადრაკო მოღვაწის ვლადიმირ დვორკოვიჩის მეათე საიუბილეო თასის გათამაშება იუნიორთა შორის, სადაც წარმატებული სტარტი აიღო საქართველოს ნაკრებმა.

სულ, ტურნირში 8 გუნდი მონაწილეობს: რუსეთი, ჩინეთი, ინდოეთი, ლატვია, საქართველო, აზერბაიჯანი, სომხეთი და დვორკოვიჩის კლუბი. თითოეული გუნდის შემადგენლობაში 3 ჭაბუკი და 1 გოგონაა.

შეჯიბრი წრიული სისტემით 7 ტურად მიმდინარეობს, საქართველოს ნაკრების ღირსებას კი გიორგი სიბაშვილი, ნოე თუთისანი, ნიკა ღვამბერია და ნინო ხომერიკი იცავენ. გუნდის კაპიტანი საერთაშორისო ოსტატი აკაკი იაშვილია.

პირველ ტურში ქართველმა მოჭადრაკეებმა ინდოელი თანატოლები 4:0 დაამარცხეს. თავის მხრივ, აზერბაიჯანმა და სომხეთმა, შესაბამისად, ჩინეთი და ლატვია 3:1 დაამარცხეს, ხოლო დვორკოვიჩის საკლუბო გუნდმა რუსეთის ნაკრებს 2.5:1.5 სძლია.

მე-2 ტურში ქართველმა მოზარდებმა აზერბაიჯანელი მოჭადრაკეები 3:1 დაამარცხეს. გიორგი სიბაშვილმა (2388) ისმაილ შახალიევს (2368) მოუგო, ნინო ხომერიკმა (2244) კი – აიდან ხოიატოვას (2202). ფრედ დაასრულეს შეხვედრები: ნოე თუთისანმა (2300) – ულვი სადიკოვთან (2379), ხოლო ნიკა ღვამბერიამ (2133) – ნიაზ ნაღდიევთან (2250).

ანალოგიური ანგარიშით 3:1 გაიმარჯვეს რუსეთმა ლატვიასთან და დვორკოვიჩის საკლუბო გუნდმა – ინდოეთის ნაკრებთან. 2.5:1.5 გაიმარჯვეს ჩინელებმა სომეხ თანატოლებთან.

ამრიგად, 2 ტურის შემდეგ 2 გამარჯვება ქართველების გარდა, მხოლოდ მასპინძელთა წარმომადგენელ დვორკოვიჩის გუნდს გააჩნია. თუმცა, საერთო ჯამური ქულებით ჩვენები 1.5 ქულით უსწრებენ მეტოქეს.

დღეს, სწორედ ლიდერთა დაპირისპირება შედგება.