საფეხბურთო კლუბ “ცხინვალის” მთავარმა მწვრთნელმა კახა კაჭარავამ “მსოფლიო სპორტთან” საუბარში განაცხადა, რომ უეფას ევროპა ლიგის პირველ ეტაპზე რუმინეთის “ბოტოშანთან” იოლი ბრძოლა არ ექნება.

კახა კაჭარავა: “რუმინული ფეხბურთი ჩვენსაზე დაბალ დონეზე დგასო რომ გითხრათ ტყუილი იქნება. რუმინელები საშუალო ევროპულ დონეზე მაღლა არიან. ამ გუნდზე ბევრი ინფორმაცია არ გვაქვს. რაც ვიცით, არც შიდა ჩემპიონატში და არც ევროთასებზე რაიმე მნიშვნელოვანი წარმატებისთვის არ მიუღწევია. ფეხბურთელები არც რუმინეთის ეროვნულ და ახალგაზრდულ ნაკრებებში ჰყავთ.

ტრადიციულად რუმინელებს ტექნიკური და ბრძოლისუნარიანი ფეხბურთელები ჰყავთ. “ბოტოშანი” შეკრებაზეა ავსტრიაში და 24 ივნისს დონეცკის “შახტართან” ამხანაგურ მატჩს ჩაატარებს. შესაძლოა, ამ თამაშის ვიდეოფირი მოვიპოვოთ და მეტოქეზე უფრო მეტი გვეცოდინება. აქამდე, რუმინელებმა ავსტრიაში ორი ამხანაგური შეხვედრა ჩაატარეს ალბანეთისა (“ბოტოშანი”-“კუკეში” 2:1, რედ.) და უნგრეთის (“ბოტოშანი”-მტკ 0:1, რედ.) გუნდებთან.

ჩვენს მსგავსად რუმინელებიც ევროთასებზე პირველად თამაშობენ და მოტივირებული იქნებიან. ასე რომ, იოლი ბრძოლა არ გველის”.