დორტმუნდის “ბორუსიას” გაბონელი თავდამსხმელით, პიერ-ემერიკ ობამეიანგი ფრანგული პსჟ-ს ინტერესთან სფეროში მოექცა.

France Football-ის ცნობით, საფრანგეთის ჩემპიონი შეტევის ხაზის გასაძლიერებლად ახალი მოთამაშეების ძიებას აგრძელებს, თუმცა ფინანსური ფეირ-პლეის პირობებიდან გამომდინარე პრობლემების გამო, პარიზელები ძვირადღირებული ვარსკვლავების შეძენას ვერ ახერხებენ და უძულებულები არიან შედარებით იაფფასიანი შემსრულებლები შეიძინონ.

ერთ-ერთ ასეთ ვარიანტად კლუბის ხელმძღვანელობა დორტმუნდელ პიერ-ემერიკს მიიჩნევს. 25 წლის გაბონელის ღირებულება 25 მილიონი ევროა და მისი გადახდა პსჟ-ს არ უნდა გაუჭირდეს. აღსანიშნავია, რომ პარიზელებს მისი შეძენა ადრეც სურდათ, მაგრამ მაშინდელმა მთავარმა მწვრთნელმა კარლო ანჩელოტიმ საბოლოოდ ამ ტრანსფერზე უარი თქვა.

ობამეიანგის კარიერა “მილანის” ახალგაზრდულ გუნდში დაიწყო, მაგრამ სახელი საფრანგეთში გაითქვა, სადაც “დიჟონში”, “ლილში”, “მონაკოსა” და “სენტ ეტიენში” თამაშობდა. ამ უკანასკნელ გუნდში ის განსაკუთრებით თვალსაჩინო მოთამაშედ იქცა და 2013 წლიდან “დორტმუნდში” გადავიდა, სადაც სხვადასხვა ტურნირებში ჩატარებულ 95 მატჩში 41 გოლი გაიტანა.