პოლონეთის საკალათბურთო ნაკრების მთავარმა მწვრთნელმა მაიკ ტეილორმა 2015 წლის ევროპის ჩემპიონატის ფინალური ეტაპისთვის წინასწარი 23-კაციანი შემადგენლობა დაასახელა. საინტერესოა, რომ ამერიკელი სპეციალისტის სიაში ყველა უძლიერესი პოლონელი მოთამაშე მოხვდა, რაც ამ გუნდის ქომაგებს საკმაოდ იმედიანად განაწყობს.

ცხადია, მთავარი ამბავი ნაკრებში მარჩინ გორტატის და მაჩიეი ლამპეს დაბრუნებაა. მათ საკვალიფიკაცოო ეტაპზე არ უთამაშიათ, თუმცა, პოლონელებმა ერთადერთი მატჩი დათმეს და ევრობასკეტ-2015-ის საგზური მაინც დამაჯერებლად მოიპოვეს.

31 წლის გორტატს ნბა-ში ერთ-ერთი ყველაზე ნაყოფიერი სეზონი ჰქონდა. “ვაშინგტონ უიზარდსის” ცენტრი რეგულარულ სეზონში საშუალოდ 12.2 ქულას, 8.7 მოხსნას და 1.3 დაფარებას აგროვებდა, “ტორონტოსთან” და “ატლანტასთან” საპლეიოფო სერიებში კი მისმა შედეგებმა უფრო იმატა – 12.4 ქულა, 8.8 მოხსნა, 1.1 დაფარება.

სეზონი ჯერაც არ დაუსრულებია ლამპეს, რომელიც ბარსელონაში გადასვლის შემდეგ, გუნდის ერთ-ერთ ლიდერად ვერაფრით იქცა, თუმცა, იქ ბოლო მოთამაშეც არაა. პოლონელი მძიმე ფორვარდი ესპანურ ლიგაში საშუალოდ 6.2 ქულას და 3.8 მოხსნას აგროვებდა, მიმდინარე პლეი-ოფში კი კატალონიელებთან ერთად ნახევარფინალში მალაგას “უნიკახას” ერკინება.

მოულოდნელია გუნდში ვეტერანი მიხალ იგნერსკის გამოჩენა. 35 წლის ფორვარდს სანაკრებო კარიერა დასრულებული ჰქონდა, თუმცა, ჩინებული საკლუბო სეზონი ჩაატარა და ევრობასკეტზე თამაშის ამბიციაც დაუბრუნდა. იგნერსკი ფრანგული “ლე მანის” ერთ-ერთი წამყვანი ფიგურა იყო ევროჩელენჯზე, სადაც საშუალოდ 12.9 ქულას და 4.1 მოხსნა აგროვებდა.

ლიდერების არყოფნაში, 2015 წლის ევროპის ჩემპიონატის შესარჩევ ციკლში წამყვან როლზე ადამ ვაჩინსკი გამოვიდა, რომელიც ნაკრებში ამჯერადაც გამოიძახეს. კვალიფიკაციაში მისი საშუალო მონაგარი 14.0 ქულა, 3.5 მოხსნა და 3.2 პასი იყო, საკლუბო დონეზე კი ის ესპანურ “ობრადოიროში” გაისარჯა და საშუალოდ 12.5 ქულას, 1.0 მოხსნას და 1.7 პასს აგროვებდა.

პოლონელთა თავკაცი გაფართოებულ შემადგენლობას 16 კალათბურთელამდე ახლო მომავალში შეკვეცავს და 20 ივლისიდან შეკრებებიც დაიწყება. მოსალოდნელია, რომ სწორედ იმ დროისთვის გაირკვევა პოლონელთა ნატურალიზებული ამერიკელი კალათბურთელის ვინაობაც. ამ ეტაპზე ყველაზე რეალურად ათენის “პანათინაიკოსის” მცველი ეი ჯეი სლოტერის კანდიდატურა მოსჩანს, რომელიც გასულ სეზონში ევროლიგაში საშუალოდ 9.7 ქულას აგროვებდა.

უკვე ცნობილია პოლონელთა მოსამზადებელი გეგმაც, რომელიც არაერთ საკონტროლო მატჩს ითვალისწინებს. გუნდი პირველ თამაშებს 1-2 აგვისტოს ჩეხებთან ჩაატარებს, შემდეგ კი ლატვიასთან, სლოვენიასთან, ესპანეთთან, ბელგიასთან, მაკედონიასთან და ისლანდიასთან სპარინგებია.

ისიც ვთქვათ, რომ მომავალ ევროპის ჩემპიონატზე პოლონეთის ნაკრები A ჯგუფში მოხვდა, სადაც მეტოქეებად მასპინძელი საფრანგეთი, ფინეთი, რუსეთი, ისრაელი და ბოსნია-ჰერცეგოვინა ეყოლება.

პოლონეთის ნაკრების წინასწარი შემადგენლობა ევრობასკეტ-2015-სთვის

ლუკაში კოშარეკი, პჟემისლავ ზამოისკი, აარონ ცელი, ადამ ჰრიჩანიუკი (“ჟიელონა გურა”), კამილ ლაჩინსკი (“კუტნო”), რობერტ სკიბნიევსკი, ლუკაშ ვიშნიევსკი (“შლიონსკი”), დარდან ბერიშა (“პრიშტინა”, კოსოვო), მიხალ ჩილინსკი, ალეკსანდერ ჩიჟი, დამიან კულიგი (“ტუროვი”), ტომაშ გიელო (მისისიპის უნივერსიტეტი, აშშ), კაროლ გრუშეჩკი, იაროსლავ მოკროში (“ენერჯა ჩარნი”), მიხალ მიხალაკი (“სოპოტი”), მატეუშ პონიტკა (“ოსტენდე”, ბელგია), მიხალ სოკოლოვსკი (“როსა რადომი”), ადამ ვაჩინსკი (“ობრადოირო”, ესპანეთი), მარჩინ გორტატი (“ვაშინგტონ უიზარდსი”, NBA), მიხალ იგნერსკი (“ლე მანი”, საფრანგეთი), პჟემისლავ კარნოვსკი (გონზაგას უნივერსიტეტი, აშშ), მაჩიეი ლამპე (“ბარსელონა”, ესპანეთი), შიმონ შევჩიკი (“კოშალინი”).