სეზონის დასრულების შემდეგ უმწვრთნელოდ დარჩენილ გენუის "სამპდორიას" ახალი თავკაცი ჰყავს. ლიგურიულ გუნდს მომავალი სეზონიდან იტალიელი სპეციალისტი ვალტერ ძენგა დამოძღვრავს. ამის შესახებ გენუელთა გუნდის ტვიტერის ოფიციალური გვერდი იუწყება.

"ვალტერ ძენგა ეს-ესაა გენუაში ჩამოვიდა იმისთვის, რომ გაარძელოს საქმე, რომელიც წლების წინ დაიწყო", - წერია "სამპას" ტვიტერზე.

თავის მხრივ, "სამპდორიას" მწვრთნელის რანგში პირველი კომენტარი თავად ძენგამაც გააკეთა:

"იტალიაში დაბრუნების დიდი სურვილი მქონდა, უფრო მეტად კი გენუაში, სადაც 2 ფანტასტიკური წელი გავატარე. ჩემი მეგობრის, სინიშა მიხაილოვიჩის ადგილის დაკავება ჩემთვის ნამდვილი გამოწვევაა. დიახ, სიმართლეა, სხვა შემოთავაზებებიც მქონდა, მაგრამ ფერეროს მსგავს პრეზიდენტთან მუშაობაზე უარს ვერ ვიტყოდი. თანაც, "სამპდორია", "სამპდორიაა".

ევროპა ლიგა? - ესეც ნამდვილი გამოწვევაა, მაგრამ ჩვენ მზად ვართ ამ ტურნირზე კარგად გამოსასვლელად.

რას ვეტყოდი "სამპას" გულშემატკივრებს? - მე დავბრუნდი", - ამბობს ძენგა.

55 წლის სპეციალისტი ბოლოს სათავეში ყატარულ "ალ ჯაზირას" ედგა, უკანასკნელი იტალიური გუნდი კი, რომელიც მას გაუწვრთნია "პალერმოა" (2009-2010).

ძენგა "სამპდორიას" მთავარი მწვრთნელის პოსტზე სერბ სინიშა მიხაილოვიჩს შეცვლის, ვინც უახლოეს დღეებში "მილანს" ჩაიბარებს. "სამპდორია" მომავალ სეზონში ევროპის ლიგაზე ითამაშებს.

აღსანიშნავია, რომ ფეხბურთელობისას ძენგა გენუის გუნდის რიგებში 1994-1996 წლებში თამაშობდა და მოედანზე 41-ჯერ გავიდა.