წლეულს იღბალი ხშირად იყო “ჰამბურგის” თანამგზავრი და არც გადამწყვეტ დროს მიატოვა. “დინოზავრები” სასწაულად გადაურჩნენ ბუნდესლიგიდან გავარდნას, რაც მათ ისტორიაში შავი ფურცელი იქნებოდა – არასოდეს გავარდნილან და იმიტომ.

ბრუნო ლაბადიას გუნდს ჯერ იმაში გაუმართლა, ბოლოდან მესამე ადგილზე რომ გავიდა და პლეი-ოფში თამაშის შანსი მიეცა მეორე ბუნდესლიგის მესამეადგილოსან “კარლსრუესთან”. და ამ მატჩებშიც ბეწვზე გადარჩა.

ჰამბურგის სტადიონზე პირველი შეხვედრა 1:1 დასრულდა, არადა, “კარლსრუე” უკეთ თამაშობდა და მეტი მომენტიც შექმნა. და აი, მეორე, გადამწყვეტ შეხვედრაშიც თითქმის იგივე სცენარი: მეორებუნდესლიგელები უკეთ გამოიყურებოდნენ და 78-ე წუთზე მაინც გაიტანეს. შეცვლაზე შესულმა იაბომ 78-ე წუთზე გაიტანა და ჰამბურგელებს მხსნელად მოევლინათ ჩილელი მარსელო დიასი, რომელმაც მსაჯის მიერ კომენსირებულ დროში საჯარიმო ზუსტად შეასრულა – 1:1.

დამატებით დროში ისეთი შთაბეჭდილება რჩებოდა, რომ პენალტების სერია არცერთ გუნდს არ სურდა. ბევრი მწვავე შეტევა ვიხილეთ და საბოლოოდ, “დინოზავრებმა” გაიტანეს: შეცვლაზე შესულმა ნიკო მიულერმა კლებერის პასით ახლოდან ზუსტად დაარტყა.

მატჩი ბუნდესლიგის საგზურისთვის

კარლსრუე-ჰამბურგი 1:2 (დამატებით დროში)

პირველი მატჩი – 1:1

კარლსრუე: ორლისჰაუზენი, გორდონი, გულდე, მაქსი (კმპე 86), კრებსი (შტოლი 89), მანუელ ტორესი, იამადა (იაბო 72), მეფერტი, ვალენტინი, ჰენინგსი, ნაზაროვი

მწვრთნელი: მარტინ კაუჩინსკი

ჰამბურგი: ადლერი, დიკმაიერი, ჯურუ, რაიკოვიჩი, ოსტრჟოლეკი, დიასი, ილიჩევიჩი (კლებერი 86), ვან დერ ვაარტი, ჰოლტბი (შტიბერი 66), ოლიჩი (ნიკო მიულერი 77), ლასოგა

მწვრთნელი: ბრუნო ლაბადია

გოლები: 1:0 იაბო (78), 1:1 დიასი (90+1), 1:2 ნიკო მიულერი (115)

გაფრთხილება: ვან დერ ვაარტი (48), დიასი (55), რაიკოვიჩი (63), კრებსი (87), მეფერტი (90), გულდე (90+2), კლებერი (101), გორდონი (118), დიკმაიერი (120)

მსაჯი: გრეფე