არგენტინის ეროვნული ნაკრების მთავარმა მწვრთნელმა ხერარდო მარტინომ TYC Sports-თან საუბარში განაცხადა, რომ კოპა ამერიკისთვის ნაკრების 23 კაციან სიას განაცხადების წარდგენის ბოლო დღეს დაასახელებს. ეს დღე კი პირველი ივნისია. სწორედ ამ დღეს კოპა ამერიკის ყველა მონაწილე გუნდს თავიანთი შემადგენლობები დასახელებული უნდა ჰქონდეთ.
მარტინოს თქმით, მას 22 ფეხბურთელი უკვე შერჩეული ჰყავს, ერთადერთი ე.წ. 9 ნომერის პოზიციაზე არაა შეჯერებული.
"საბოლოო 23 კაციან სიას ბოლო დღეს გავაჟღერებ, თუმცა გუნდის ძირითადი ნაწილი უკვე შერჩეული მყავს.
მხოლოდ 9 ნომრის პოზიციაზე არ მაქვს გადაწყვეტილება მიღებული - კარლოს ტევესმა და სერხიო აგუერომ სეზონი შესანიშნავად და მაღალ დონეზე დაასრულეს, გონსალო იგუაინისგან განსხვავებით, მაგრამ იგუაინი ნაკრებში ყოველთვის კარგად ასპარეზობს", - განაცხადა მარტინომ.
კოპა ამერიკის 2015 წლის გათამაშება 11 ივნისს დაიწყება და 4 ივლისამდე გასტანს.
