ტოკიოს “რიოგოკუ კოკუგიკანში” გამართული ნაცუ ბაშო სენსაციური შედეგით დასრულდა. მაისის სუპერტურნირის გამარჯვებული მონღოლი სეკივაკე ტერუნოფუჯი გახდა, რომელმაც 12 მოგება და 3 მარცხი მოაგროვა და ოძეკის ტიტულამდე აღზევებაც გაინაღდა.

ტერუნოფუჯიმ დასავლეთის მე-6 მაეგაშირა აოიამას იორიკირით სძლია და უმთავრეს კონკურენტ ჰაკუჰოს აჯობა, რომელიც იოკოძუნათა ჯახში ჰარუმაფუჯისთან იორიტაოშით დამარცხდა. “დიდი ჩემპიონების” დარად, 11-11 მოგებით დაასრულა ბაშო ოძეკი კისენოსატომაც.

ნაცუ ბაშოს დასკვნითი დღე წარმატებული გამოდგა ქართველი სეკიტორებისთვის. ტოჩინოშინის შიკონათი ცნობილმა ლევან გორგაძემ 6 მოგების წილ მე-9 გამარჯვება იზეიმა. დასავლეთის პირველი მაეგაშირას წოდების მქონე ქართველმა აღმოსავლეთის მე-9 მაეგაშირა ჰომარეფუჯის უვატენაგეთი სძლია.

ახლა, ტოჩინოშინი მომავალი ბანძუკეს (რეიტინგი) მოლოდინშია. საქმეის გახლავთ, რომ წინასწარი გათვლებით, გორგაძეს სანიაკუში (პირობითი კატეგორია, რომელშიც 4 უმაღლესი წოდების – იოკოძუნა, ოძეკი, სეკივაკე, კომუსუბი – მქონე სუმოისტები არიან გაერთიანებულნი) აღზევება ეკუთვნის, თუმცა, ვინაიდან კონკურენტიც არაერთი ჰყავს, გადაჭრით რაიმეს თქმა რთული იქნება.

მცირე უკუსვლა ელის თეიმურაზ ჯუღელს იგივე გაგამარუს, რომელმაც მინიმალური უარყოფითი ბალანსი (7 მოგება, 8 მარცხი) დააფიქსირა. ბოლო დღეს, ქართველმა სუმოისტმა აღმოსავლეთის მე-14 მაეგაშირა იოშიკაძე ოშიდაშით დაჯაბნა. შეგახსენებთ, რომ ტოკიოში გაგამარუ აღმოსავლეთის მე-6 მაეგაშირას წოდებით ირჯებოდა.

ნაცუ ბაშოს დასკვნითი დღის მიმოხილვა

გაგამარუს ორთაბრძოლა 4:10-დან, ტოჩინოშინის 7:20-დან