ქართველ სუმოისტ ლევან გორგაძეს იგივე ტოჩინოშინს ნაცუ ბაშოს საწყისი 6 დღის თავზე 1 ერთადერთი გამარჯვება ჰქონდა, თუმცა, შემდეგ, 8 ორთაბრძოლიდან 7 მოიგო და დადებითი ბალანსი (კაჩი-კოში) გაინაღდა.

ტოკიოს “რიოგოკუ კოკუგიკანში” მიმდინარე მაისის სუპერტურინრის ბოლოსწინა დღეს ტოჩინოშინმა ერთ-ერთ ლიდერ – აღმოსავლეთის მე-11 მაეგაშირა კაისეის იორიკირით სძლია და ახლა, 8 მოგება და 6 მარცხი გააჩნია. ამგვარად, დიდი ალბათობით, ქართველი სეკიტორი სანიაკუს (პირობითი კატეგორია, რომელშიც 4 უმაღლესი წოდების – იოკოძუნა, ოძეკი, სეკივაკე, კომუსუბი – მქონე სუმოისტები არიან გაერთიანებულნი) წევრი გახდება.

ტოჩინოშინი დასკვნით შერკინებას აღმოსავლეთის მე-9 მაეგაშირა ჰომარეფუჯის წინააღმდეგ გამართავს, რომელსაც თანაბარი ბალანსი (7-7) გააჩნია და კაჩი-კოშისთვის მაქსიმუმს გაიღებს.

სამწუხაროდ, წოდებაში უკუსვლა ელის გაგამარუს შიკონათი ცნობილ თეიმურაზ ჯუღელს, რომელსაც 6 მოგების წილ 8 მარცხი გააჩნია. ქართველი გოლიათი ნაცუ ბაშოს აღმოსავლეთის მე-6 მაეგაშირას წოდებით შეხვდა, მორიგი გამარჯვება კი დასავლეთის მე-15 მაეგაშირა კოტოიუკისთან იზეიმა. ჯუღელმა მეტოქეს ოშიდაშით სძლია.

გაგამარუ დასკვნით შერკინებას აღმოსავლეთის მე-14 მაეგაშირას იოშიკაძეს წინააღმდეგ ჩაატარებს, რომელსაც 10 გამარჯვება გააჩნია.

ცნობისთვის, ასეთივე მონაგარი იოკოძუნა ჰარუმაფუჯის, ოძეკი კისენოსატოს და რიგით მაეგაშირებს – იკიოის, ტაკაიასუს და კაისეის აქვთ, ლიდერები კი იოკოძუნა ჰაკუჰო და სეკივაკე ტერუნოფუჯი არიან 11-11 მოგებით. ისიც ვთქვათ, რომ დღეს, მონღოლმა “თეთრმა ფენიქსმა” ხსენებულ კისენოსატოსთან ცუკიოტოშით წააგო.

ნაცუ ბაშოს მე-14 დღის მიმოხილვა

გაგამარუს ორთაბრძოლა 3:51-დან, ტოჩინოშინის - 8:23-დან