ქართველი ჩოგბურთელები სოფო შაფათავა და ეკატერინე გორგოძე იტალიის ქალაქ კასერტაში მიმდინარე საერთაშორისო ტურნირის (საპრიზო ფონდი 25 ათასი დოლარი) გამარჯვებულები გახდნენ.

წყვილთა ტურნირში მე-4 ნომრად განთესილმა ქართველმა გოგონებმა საჩემპიონო გზაზე 4 მატჩი ისე მოიგეს, სეტიც კი არ დაუთმიათ. ფინალში შაფათავა და გორგოძე მე-3 რეიტინგის მქონე იტალიურ-თურქულ დუეტს (მატეუჩი-სოილუ) გადაეყარნენ და 6:0, 7:6 (8:6) სძლიეს.

ამით, გორგოძემ მცირე რევანში აიღო ერთეულთა ტურნირში მარცხისთვის. შეგახსენებთ, რომ მეოთხედფინალში გორგოძემ თურქ სოილუსთან 3:6, 6:4, 3:6 წააგო.