თეიმურაზ ჯუღელის პირველი კიმბოში. გაგამარუს შიკონათი ცნობილმა ქართველმა გოლიათმა ოქროს ვარსკვლავი მონღოლი იოკოძუნა ჰარუმაფუჯის დამარცხების წყალობით მიიღო, რაც მის კარიერაში ყველაზე დიდი მიღწევაა.

შეგახსენებთ, რომ გაგამარუ ნაცუ ბაშოს აღმოსავლეთის მე-6 მაეგაშირას წოდებით შეხვდა და დღევანდელი ტურის თავზე 6 მარცხის წილ 4 გამარჯვება მოუგროვდა, რაც დადებითი ბალანსის (კაჩი-კოში) დაფიქსირების შანსს უტოვებს.

ჰარუმაფუჯისთან შერკინება ქართველისთვის ტრიუმფალური აღმოჩნდა. გაგამარუმ პირველივე წამებიდან შეუეტია და დიდი ჩემპიონი ოშიდაშით დოჰიოდან ისე გაიყვანა, მონღოლმა კონტრშეტევაზე გადასვლაც ვერ მოასწრო.

“უბედნიერესი ვარ. ეს ნამდვილად დიდი გამარჯვებაა. თავიდანვე შეტევაში გადასვლა მარტივი მიზეზის გამო გადავწყვიტე. სხვაგვარად, ჰარუმაფუჯისთან წარმატების შანსი არ მექნებოდა”, - განაცხადა ჯუღელმა მინი-ინტერვიუში და უდიდესი სიხარული არც დაუმალავს.

გაგამარუ შემდეგი მეტოქე გაცილებით დაბალი რანგისაა. ტოიოჰიბიკი დასავლეთის მე-12 მაეგაშირას წოდებით ასპარეზობს და უკვე 7 მარცხი გააჩნია, ამდენად, ქართველ სეკიტორს წინსვლის კარგი შანსი აქვს.

შეგახსენებთ, რომ ტოკიოს “რიოგოკუ კოკუგიკანში” მიმდინარე მაისის სუპერტურნირზე კიდევ ერთი ქართველი ლევან გორგაძე იგივე ტოჩინოშინი ირჯება, რომელსაც 10 დღის თავზე ასევე 4 მოგება გააჩნია. დღეს დილით ის აღმოსავლეთის მე-10 მაეგაშირა სადანოუმისთან იორიკირით დამარცხდა.

დასავლეთის პირველი მაეგაშირას წოდებით მოასპარეზე ტოჩინოშინი მომდევნო ბრძოლას აღმოსავლეთის პირველ მაეგაშირა ტაკარაფუჯისთან გამართავს.

ამ დროისთვის, ნაცუ ბაშოს 2 ლიდერი ჰყავს – იოკოძუნა ჰაკუჰო და ბრაზილიელი მე-11 მაეგაშირა კაისეი. მათ აქტივში 9-9 გამარჯვებაა.

ნაცუ ბაშოს მე-10 დღეს მიმოხილვა

ტოჩინოშინის ორთაბრძოლა 6:27-დან, გაგამარუს – 11:50-დან