ლონდონის "ჩელსის" პორტუგალიელმა მთავარმა მწვრთნელმა ჟოზე მოურინიომ ინგლისურ მედიასთან საუბრისას სურვილი გამოთქვა, რომ გუნდის სათადარიგო მეკარე პეტერ ჩეხი ზაფხულში "არისტოკრატებს" არ დატოვებს. მოურინიოს თქმით, თუ მაინცდამაინც ასე მოხდება, მაშინ გამოცდილი მეკარე სათამაშოდ პრემიერლიგის გუნდში არ გადავა.
"ჩვენ ორი მაღალი დონის მეკარე გვჭირდება. პეტერის გარეშე არმგონია ჩემპიონები გავმხდარიყავით. იმედი მაქვს, იგი ჩვენთან დარჩება, მაგრამ თუ ასე არ მოხდა, ვიმედოვნებ, რომ პრემიერლიგის სხვა გუნდში არ გადავა, არ მინდა, რომ მის წინააღმდეგ თამაში მოგვიწიოს", - განაცხადა მოურინიომ.
პეტერ ჩეხმა მიმდინარე სეზონის წინ "ჩელსის" ძირითად შემადგენლობაში ადგილი დაკარგა. მან წლეულს ინგლისის პრემიერლიგაში მხოლოდ 6 თამაში ჩაატარა. მის სახელს ბოლო დროს იტალიური გუნდებს და "ლივერპულს" უკავშირებენ.
