როგორც ფრანგული პრესა იუწყება, არსენ ვენგერი ლიგა 1-ში მოასპარეზე ორი ფეხბურთელით, “მონაკოს” მცველ აიმენ აბდენურითა და “ლიონის” ფორვარდ ნაბილ ფეკირით დაინტერესდა. აღნიშნულ ცნობას ფრანგული ფეხბურთის ექსპერტი მეტ სპირო ავრცელებს.

25 წლის ტუნისელი აიმენ აბდენური კარიერის საწყის ეტაპზე მშობლიურ ჩემპიონატში თამაშობდა, 2010 წელს მცირე დრო ბრემენის “ვერდერში” დაჰყო, 2011 წელს კი საფრანგეთის ლიგა 1-ის კლუბ “ტულუზასთან” გააფორმა კონტრაქტი. 2014 წელს “მონაკოში” განაგრძო კარიერა და გუნდის სასტარტო შემადგენლობის უცვლელი წევრია.

21 წლის ნაბილ ფეკირი წარმოშობით ალჟირელია, თუმცა ალჟირის ნაკრებში მიწვევის მიუხედავად საფრანგეთის ეროვნულ გუნდში თამაში არჩია. მისი დებიუტიDდიდიე დეშამის გუნდში მიმდინარე წელს შედგა. ფეკირი 2011 წლიდან “ლიონის” ფეხბურთელია, 2013 წლიდან კი ძირითად გუნდში დამკვიდრდა.