ლიტვის საკალათბურთო ნაკრების მთავარმა მწვრთნელმა იონას კაზლაუსკასმა ის გაფართოებული შემადგენლობა დაასახელა, რომელიც 2015 წლის ევროპის ჩემპიონატისთვის მოემზადება, საბოლოო სია კი, ცხადია, მოგვიანებით გამოქვეყნდება.

საინტერესოა, რომ 25 მოთამაშიდან ლეგიონერი მხოლოდ ცხრაა, შინაური პირველობიდან კი ყველაზე მეტი წარმომადგენელი (7) ვილნიუსის ჟალგირისს ჰყავს.

მიუხედავად იმისა, რომ შემადგენლობაში მოხვდნენ, ევრობასკეტზე საეჭვოა დომანტას მოტეიუნასის და ლინას კლეიზას თამაში. “ჰიუსტონ როკეტსის” ფორვარდი ტრავმირებულია და პლეი-ოფში გუნდს ვერაფრით ეხმარება, “ემპორიო არმანის” ფორვარდი კი, რომელსაც გასულ ზაფხულს მსოფლიო ჩემპიონატზე არ უთამაშია, ჯერაც ორჭოფობს. კლეიზამ უკვე განუცხადა კაზლაუსკასს, რომ პასუხს სეზონის დასრულების შემდეგ აცნობებს.

ისიც სათქმელია, რომ გაფართოებულ სიაში ერთბაშად 11 კალათბურთელია, რომელთაც ეროვნული გუნდის მაისური ერთხელაც არ მოურგიათ.

სპეციალურ პრეს-კონფერენციაზე გაცხადდა, რომ ბალტიისპირელები მოსამზადებელ ციკლში ათ საკონტროლო მატჩს ჩაატარებენ. ლიტველთა მეტოქეები ავსტრალია (2-ჯერ), ფინეთი, ავსტრია, თურქეთი (2-ჯერ), მაკედონია, ხორვატია, ჰოლანდია და საბერძნეთი იქნებიან.

შეგახსენებთ, რომ გასული ევროპის ჩემპიონატის ფინალისტი ლიტველები მომავალ ევრობასკეტზე D ჯგუფში მოხვდნენ და ლატვიის დედაქალაქ რიგაში თამაში მოუწევთ, სადაც მასპინძელთა გარდა, ესტონეთს, ბელგიას, უკრაინას და ჩეხეთს ეთამაშებიან.

ლიტვის საკალათბურთო ნაკრების გაფართოებული შემადგენლობა

დეივიდას გაილიუსი (ნეპტუნასი), მარტინას გეჩევიჩიუსი (ლიეტუვას რიტასი), როკას გიედრაიტისი (შიაულაი), მინდაუგას გირძიუნასი (ნეპტუნასი), არტურას გუდაიტისი (ჟალგირისი), ზიგიმანტას იანავიჩიუსი (ლიეტუვას რიტასი), პაულიუს იანკუნასი (ჟალგირისი), რობერტას იავტოკასი (ჟალგირისი), ადას იუშკევიჩიუსი (ლიეტუვას რიტასი), მანტას კალნიეტისი (თავისუფალი აგენტი), ვალდას კარინიაუსკასი (ჟალგირისი), ლინას კლეიზა (ემპორიო არმანი, იტალია), ანტანას კავალიაუსკასი (ლიეტუვას რიტასი), მინდაუგას კუზმინსკასი (უნიკახა, ესპანეთი), დარიუს ლავრინოვიჩი (რეჯიო ემილია, იტალია), ლუკას ლეკავიჩიუსი (ჟალგირისი), იონას მასიულისი (რეალი, ესპანეთი), არტურას მილაკნისი (ჟალგირისი), დონატას მოტეიუნასი (ჰიუსტონი, აშშ), გედიმინას ორელიკი (ლიეტუვას რიტასი), მარტინას პოჩიუსი (გალათასარაი, თურქეთი), დომანტას საბონისი (გონზაგას უნივერსიტეტი, აშშ), რენალდას სეიბუტისი (დარუშაფაკა, თურქეთი), ედგარას ულანოვასი (ჟალგირისი), იონას ვალანჩიუნასი (ტორონტო, აშშ).