კრეტას ოფი-ს ყოფილმა ნახევარმცველმა გიორგი მერებაშვილმა athleticradio.gr-სთან განაცხადა, რომ საბერძნეთის კლუბები ეპატიჟებიან, მაგრამ სხვა ქვეყნის გუნდებიდან უკეთესი წინადადებები აქვს.

გიორგი მერებაშვილი: “მსურს ოფი-ში ყველა მოვიკითხო. გუნდი და ქალაქი საუკეთესო შთაბეჭდილებით დავტოვე. ბევრ ადამიანთან დავმეგობრდი და თავს როგორც მეორე ოჯახში ისე ვგრძნობდი. საწყენია, რომ ასე მოხდა, რადგან საბერძნეთში დაბრუნება და “შავ-თეთრი” მაისურის ჩაცმა ყოველთვის მსურდა. კრეტაზე ჩასულმა ოფი-ს შესახებ ცოტა რამ გიორგი ლორიასგან ვიცოდი, რომელიც გუნდში ჩემზე ადრე ჩაირიცხა. ოფი კარგი გუნდი იყო, სადაც კარგი ფეხბურთელები თამაშობდნენ. თუმცა, პრობლემების გამო დასახულ მიზანს ვერ მივაღწიეთ. ბოლო თვეებში პრობლემები უფრო გამძაფრდა და ჩვენმა მცდელობამ ოფი-ს ეფექტი არ მოუტანა. საწყენია, რომ გუნდი სუპერლიგაში ადგილს ვერ შეინარჩუნებს”.

ქართველი ფეხბურთელის თქმით, გუნდის ყოფილი მთავარი მწვრთნელი იტალიელი ჯენარო გატუზო სიტუაციის გამოსასწორებლად ყველაფერს აკეთებდა და მისი წასვლის შემდეგ პრობლემები კიდევ უფრო მომრავლდა:

“გატუზოს რაც შეეძლო გუნდს ეხმარებოდა, მაგრამ თავს მარტო გრძნობდა. მისი წასვლის შემდეგ პრობლემები უფრო მომრავლდა. ყველა მოთამაშე ვინც დარჩა არსებული პრობლემების მიუხედავად გუნდის დახმარებას ცდილობდა. ჩვენ ერთი ოჯახივით ვიყავით და მნიშვნელობა არ ჰქონდა მეტოქე პაოკ-ი გვყავდა თუ “პანათინაიკოსი”. ყველა თამაშზე მოედანზე გლადიტორებივით გავდიოდით”.

მერებაშვილმა აღნიშნა, რომ გუნდის დახმარებას ცდილობდა, მაგრამ ზოგიერთი ადამიანისგან სათანადო პატივისცემას ვერ გრძნობდა:

“ოფი-ზე როდესაც ვფიქრობ, ჩემი აზრით საბერძნეთმა დაკარგა გუნდი, რომელიც სუპერლიგაში თამაშს იმსახურებდა. გუნდის დახმარება მსურდა, მაგრამ ხანდახან ვგრძნობდი, რომ ზოგიერთი ადამიანი ჩემს მიმართ სათანადო პატივისცემას არ იჩენდა”.

მან მომავალში ოფი-ში დაბრუნებაც არ გამორიცხა:

“ რატომაც არა? ოფი ჩემს გულშია, რადგან ეს გუნდი ნამდვილად მიყვარდა, მიუხედავად იმისა, რომ მის რიგებში რამდენიმე თვე ვთამაშობდი. ვგრძნობდი, რომ ოფი ჩემი სახლი იყო და გუნდში დარჩენა მსურდა. დავეხმარები ოფი-ს, რადგან დარწმუნებული ვარ, რომ სუპერლიგაში დაბრუნდება და იმ პოზიციას დაიკავებს, რომელსაც იმსახურებს”.

რაც შეეხება მომავალ გეგმებს, მერებაშვილმა შემდეგი თქვა:

“ ჯერ არ ვიცი სად ვითამაშებ. ახალი სეზონისთვის საბერძნეთიდან წინადადებები მაქვს, მაგრამ სხვა ქვეყნებიდან უკეთესი შემოთავაზებებია”.

მერებაშვილი საქართველოს ეროვნული ნაკრების მეკარე გიორგი ლორიას თემასაც შეეხო, რომელთან ერთად ოფი-ში გამოდიოდა:

“ლორიამ დაამტკიცა, რომ ერთ-ერთი საუკეთესო მეკარეა. ის ძალიან კარგად თამაშობდა და თავისი შესაძლებლობა რეალურად აჩვენა. ჩვენ საკმაოდ ხშირად ვსაუბრობთ, რადგან ვმეგობრობთ, მაგრამ არ ვიცი კარიერას სად გააგრძელებს. თუმცა, აჩვენა, რომ ისეთმა გუნდებმა, როგორიც პაოკ-ი და “ოლიმპიაკოსია” მისთვის უნდა იბრძოლონ”.