ვაჟთა შორის საქართველოს პირველი ჩოგანი ნიკოლოზ ბასილაშვილი თურქეთის ქალაქ სტამბოლში მიმდინარე საერთაშორისო ტურნირის (საპრიზო ფონდი 494 310 ევრო) წყვილთა თანრიგსაც გამოეთიშა.

ბასილაშვილი და თურქი ტუნა ალტუნა მე-3 რეიტინგის მქონე ავსტრალიურ-ბრაზილურ დუეტთან (კრის გუჩიონე-ანდრე სა) ფავორიტები არც ყოფილა და აკი, 3:6, 4:6 წააგეს.

მარცხი შეემთხვა ოქსანა კალაშნიკოვასაც, რომელიც ჩეხეთის დედაქალაქ პრაღაში მიმდინარე 250-ათასიანი ტურნირის წყვილთა შეჯიბრში დანკა კოვინიჩთან ერთად ირჯებოდა. ქართველი და მონტენეგროელი ჩოგბურთელები შვეიცარიელ ბელინდა ბენჩიჩთან და კატერინა სინიაკოვასთან 3:6, 6:3, 10:12 დამარცხდნენ.

მიმდინარე კვირაში ასპარეზობა დაასრულა თამარ ჭალაგანიძემაც. ეგვიპტური შარმ ელ შეიხის 10-ათასიანი ტურნირის მერვედფინალში ქართველმა გოგონამ პირველ ნომრად განთესილ იტალიელ ანასტასია გრიმალსკასთან 3:6, 0:6 წააგო.

დასასრულ, გიორგი ცივაძეზეც ვთქვათ, რომელიც ყაზახეთის ქალაქ შიმკენტში მიმდინარე 15-ათასიანი ტურნირის მეოთხედფინალში მასპინძელ დენის იევსეევთან 2:6, 1:6 დამარცხდა.