მსოფლიოს გუნდურ ჩემპიონატზე გამარჯვების შემდეგ სამშობლოში დაბრუნდა საქართველოს ქალ მოჭადრაკეთა ნაკრები. ქართველ მოჭადრაკეებს თბილისის აეროპორტში უამრავი გულშემატკივარი დახვდა. მათ შორის იყო „მსოფლიო სპორტიც“, რომელმაც გუნდის წარმომადგენლებთან ინტერვიუ ჩაწერა.

ელიზბარ უბილავა (საქართველოს ქალ მოჭადრაკეთა გუნდის მთავარი მწვრთნელი)

- რას გვეტყვით ნაკრების წევრებზე? თითოეულ მათგანს როგორ დაახასიათებთ?

- გუნდის გამარჯვებაში ყველამ თავისი წვლილი შეიტანა. ბელა ხოტენაშვილმა და მერი არაბიძემ შესაბამისად პირველ და მესამე დაფაზე პირველი ადგილი დაიკავეს და ამით ყველაფერია ნათქვამი. მეორე დაფაზე მოასპარეზე ლელა ჯავახიშვილს ეგრედწოდებული ჩამკეტის როლი ჰქონდა, რომელსაც მეტოქის წამყვანი მოჭადრაკეები უნდა შეეჩერებინა. ასევე კარგად ითამაშეს გუნდის სხვა წევრებმა ნინო ბაციაშვილმა და სალომე მელიამ, რომლებმაც ნაკრების გამარჯვებაში თავიანთი წვლილი შეიტანეს. გუნდში იყო ერთსულოვნება და დასახული მიზნის მისაღწევად ყველაფერი გავაკეთეთ.

- ყველაზე რთული რომელი შეხვედრა გამოდგა?

- პირველივე მატჩში ჩვენს უშუალო კონკურენტ რუსეთს შევხვდით. აღნიშნული შეხვედრა ფრედ 2:2 დასრულდა. როგორც მოვლენების შემდგომმა განვითარებამ გვიჩვენა, ეს შეხვედრა ყველაზე რთული გამოდგა.

- საქართველოში სამუშაოდ თქვენ 20-წლიანი პაუზის შემდეგ დაბრუნდით. ეს ვისი მოწვევით მოხდა?

- საქართველოს ჭადრაკის ეროვნული ფედერაციის მოწვევით დავბრუნდი და დავინიშნე საქართველოს ქალ მოჭადრაკეთა ნაკრების მწვრთნელად.

- როდემდე გაქვთ კონტრაქტი?

- კონტრაქტი უკვე ამომეწურა, ხელშეკრულება ქალ მოჭადრაკეთა გუნდური ჩემპიონატის დასრულებამდე მქონდა გაფორმებული.

- თუ აპირებთ აღნიშნული კონტრაქტის გახანგრძლივებას?

- ეს მარტო ჩემზე არაა დამოკიდებული.

გია გიორგაძე (საქართველოს ჭადრაკის ეროვნული ფედერაციის პრეზიდენტი)

- როგორ შედეგს გეგმავდით ჩინეთში დასრულებულ მსოფლიოს ჩემპიონატზე?

- პირველ სამეულში მოხვედრა გვქონდა დაგეგმილი. როგორც ხედავთ გეგმა გადაჭარბებით შევასრულეთ და პირველად ქართული ჭადრაკის ისტორიაში მსოფლიოს გუნდური ჩემპიონატი მოვიგეთ ქალთა შორის.

- თქვენ რას გვეტყვით ნაკრების წევრებზე?

- უკვე რამდენიმე წელია საქართველოს ჭადრაკის ფედერაციის პრეზიდენტი ვარ და ქალთა ნაკრებში ასეთი ერთსულოვნება არასდროს მინახავს. ნაკრების თითოეულმა წევრმა შესაძლებლობის მაქსიმუმი გაიღო და შედეგიც მივიღეთ.

- თქვენი აზრით ვინ იყო ამ ყველაფრის მთავარი შემოქმედი?

- როგორც უკვე აღვნიშნე, ნაკრების თითოეული წევრიდან დაწყებული და დამთავრებული გუნდის კაპიტნითა და მთავარი მწვრთნელით თავისი მოვალეობა ყველამ კარგად შეასრულა და რომელიმე მათგანის გამორჩევისაგან თავს შევიკავებ.

- მთავარ მწვრთნელ ელიზბარ უბილავას კონტრაქტი ამოეწურა. თუ აპირებთ უბილავასთვის ხელშეკრულების გახანგრძლივებას?

- რა თქმა უნდა, ელიზბარ უბილავას კონტრაქტს 2015 წლის სეზონის ბოლომდე გავუხანგრძლივებთ.

მერი არაბიძე (ქალ მოჭადრაკეთა ეროვნული ნაკრების წევრი)

- რას გვეტყვით ჩემპიონობის შესახებ. თუ გეგმავდით ასეთ წარმატებას?

- ყველა ძალიან გახარებული და ბედნიერები ვართ. ნაკრები გუნდის ლიდერის ნანა ძაგნიძის გარეშე თამაშობდა. ნანაც რომ ყოფილიყო მსოფლიოს ჩემპიონატზე იმდენად ძლიერი გუნდები მონაწილეობდნენ, რომ არასერიოზული გადაწყვეტილება იქნება წინასწარ პირველი ადგილი დაგეგმო. ჩვენი მიზანი სამეულში მოხვედრა და ერთ-ერთი სინჯის მედლის მოპოვება იყო. ჩემპიონატის დაწყების შემდეგ მოვლენები ისე განვითარდა, რომ ყველაზე ძვირფასი ოქროს მედალი გვერგო.

-მოვლენები თავისით არასოდეს ვითარდება, ყველაფერს თავისი მიზეზი აქვს. რა იყო ის მიზეზი რომლითაც თქვენ ასეთ დიდ წარმატებას მიაღწიეთ?

- ერთსულოვნება, დისციპლინა, მიზანდასახულობა, მონდომება რა ვიცი, რომელი ერთი ჩამოვთვალო. ნაკრებში ძალიან კარგი, მეგობრული განწყობა იყო ერთმანეთის მიმართ. ალბათ ეს იყო ჩვენი გამარჯვების ძირითადი მიზეზი...