მადრიდის “რეალი” მექსიკელი თავდამსხმელის, ხავი ერნანდესის სატრანსფერო უფლებების გამოსყიდვის შესაძლებლობას განიხილავს.

ამჟამად 26 წლის ფეხბურთელი “სანტიაგო ბერნაბეუზე” განათხოვრების წესით თამაშობს, მისი უფლებები კი, “მანჩესტერ იუნაიტედს” ეკუთვნის. ჩიჩარიტოს დროებითი სარგებლობისთვის “სამეფო კლუბმა” უკვე სამჯერ გადაიხადა 2,5 მილიონი ევრო. გარდა ამისა, სამი მილიონი ევრო, რაც მექსიკელის წლიური ანაზღაურების ნახევარია “მანჩესტერ იუნაიტედში”, თავად მოთამაშის ჯიბეში წავიდა.

ცნობილი გახდა, რომ განათხოვრების შეთანხმებაში არის პუნქტი, რომლის თანახმადაც მადრიდელებს ხავი ერნანდესის სრულფასოვანი ტრანსფერის განსახორციელებლად მანჩესტერელებისთვის 10 მილიონი ევრო ექნებათ გადასახდელი. ესპანეთის დედაქალაქში დარჩენის სურვილს მექსიკელიც გამოთქვამს, მაგრამ კლუბში საბოლოო გადაწყვეტილება ჯერ არ მიუღიათ.