ჰოლანდიის ერედივიზიონის 2014/15 წლების სეზონის გამარჯვებული პსვ გახდა. ფილიპ კოკუს შეგირდებმა შინ “ჰერენვეენი” 4:1 გაანადგურეს და სატურნირო ცხრილში 31 ტურის შემდეგ 79 ქულა მოაგროვეს.

ამსტერდამის “აიაქსი” მეორე ადგილზე 66 ქულით იმყოფება, დედაქალაქელებს 4 შეხვედრა აქვთ ჩასატარებელი, თუმცა ჩემპიონობის შანსი აღარ დარჩათ.

პსვ ტიტულს 2008 წლის შემდეგ პირველად დაეუფლა, სულ კი ერედივიზიონის გამარჯვებულები 22-ედ გახდა. კოკუს შეგირდებმა ჰოლანდიის ჩემპიონატში “აიაქსის” 4-წლიანი გამარჯვებათა სერია შეწყვიტეს. ჰოლანდიაში ყველაზე მეტი გამარჯვება “აიაქსს” ეკუთვნის, ამსტერდამელებმა ერედივიზიონი 33-ჯერ მოიგეს.

მიმდინარე სეზონის ბომბარდირთა დავას პსვ-ს ფეხბურთელები მემფის დეპაი (20 გოლი) და ლუკ დე იონგი (19) ლიდერობენ. მესამე ადგილზე “დან ჰააგის” თავდამსხმელი, ასევე ჰოლანდიელი კრამერი (16) გახლავთ და დიდი ალბათობით საუკეთესო მეგოლის ტიტულიც ეინდჰოვენელთა წარმომადგენელს გადაეცემა.