“პორტუს” მთავარმა მწვრთნელმა ხულენ ლოპეტეგიმ განაცხადა, რომ მადრიდის “რეალის” ინტერესის შესახებ გავრცელებული ცნობა არ აინტერესებს და პორტუგალიაში თავს კარგად გრძნობს.

ესპანური მედიის მიერ გავრცელებული ინფორმაციის თანახმად, “სამეფო გუნდი” ესპანელი სპეციალისტით დაინტერესდა და კლუბის ხელმძღვანელობა ლოპეტეგის კარლო ანჩელოტის შემცვლელად ამზადებს.

“აღნიშნული ინფორმაცია არ მაინტერესებს. “პორტუში” თავს კარგად ვგრძნობ და კლუბთან კონტრაქტი მაკავშირებს.” – განაცხადა ესპანელმა.

ხულენ ლოპეტეგიმ “პორტუ” მიმდინარე სეზონის დაწყებამდე ჩაიბარა და კლუბთან სამწლიანი ხელშეკრულება გააფორმა. ესპანელის გაწვრთნილმა გუნდმა ჩემპიონთა ლიგის მეოთხედფინალში მიუნხენის “ბაიერნი” “დრაგაუზე” 3:1 დაამარცხა და ნახევარფინალისთვის სერიოზული განაცხადი გააკეთა. პორტუგალიის ჩემპიონატში ლოპეტეგის “პორტუ” 68 ქულით მეორე ადგილზე იმყოფება და ლიდერ “ბენფიკას” 3 ქულით ჩამორჩება.